Առաջիկայում նոր զարգացումներ են սպասվում ՀՀ ոստիկանության քրեական հետախուզության գլխավոր վարչության նախկին պետ, ոստիկանության գեներալ Հովհաննես Թամամյանի առնչությամբ, ով 2011թ. փետրվարի 25-ին հեռացվել էր համակարգից:
Հիշեցնենք, որ ազատման հիմնական պատճառը եղել էր այն, որ Հ.Թամամյանի անմիջական ցուցումով սպանության մեղադրանք էր բարդվել ԱԺ նախագահի նախկին խորհրդական Հովհաննես Շահինյանի քրոջ որդու վրա: Այժմ իշխանությունները որոշել են, Հովիկ Թամամյանի դեմ պատրաստվող քրեական գործերին համալրել վերջին տարիների ամենաաղմկահարույց գործերից մեկը` Լևոն Գուլյանի «ինքնասպանության» գործը, որին հարցաքննողը եղել է Հովիկ Թամամյանը։
Հիշեցնենք, 2007 թ–ի մայիսի 12–ին Լևոն Գուլյանը մահացել է ՀՀ Ոստիկանության շենքում, ուր նա հրավիրվել էր ցուցմունքներ տալու՝ որպես սպանության վկա: 2007թ.-ից ի վեր այս գործը հասարակական քննարկումների ուշադրության կենտրոնում է եղել, անցկացվել են բազմաթիվ ակցիաներ, միջոցառումներ և մամլո ասուլիսներ, որոնց պահանջն էր պարզել ճշմարտությունը։ Մարդը մուտք է գործել Ոստիկանության շենք և այլևս այնտեղից դուրս չի եկել։
Մայիսի 9–ին Պարոն Գուլյանը ականատես էր եղել մի քանի տղամարդու միջև վեճի, որն ավարտվել է կրակոցներով և նրանցից մեկի սպանությամբ։ Դեպքը տեղի էր ունեցել Գուլյանին պատկանող ռեստորանի մոտակայքում։ Նույն օրը երեկոյան պարոն Գուլյանը և այդ ռեստորանի երկու աշխատակիցներ հրավիրվել էին Շենգավիթի ոստիկանության բաժին որպես սպանության վկա։ Այնտեղ Լևոնը գրավոր ցուցմունք է տվել այն ամենի մասին, ինչին ականատես է եղել, սակայն պահվել է ոստիկանության բաժնում մինչև մայիսի 10–ի ուշ երեկո։ Դրանից հետո նրան երկու անգամ թույլ են տվել տուն գնալ, սակայն պահանջել են, որ վերադառնա։
Երկու դեպքերում էլ Լևոն Գուլյանը ենթարկվել է պահանջին: Ըստ Գուլյանի ընտանիքի անդամների և ռեստորանի նշված երկու աշխատողների, բոլոր երեք վկաները քննչական գործողությունների ընթացքում ենթարկվել են հոգեբանական և/կամ ֆիզիկական բռնության։ Մայիսի 12–ին պարոն Գուլյանին տեղափոխել են ՀՀ Ոստիկանության շենք, չնայած այն փաստի, որ Շենգավիթի ոստիկանության բաժնի քննչական խումբը վստահեցնում է, որ բոլոր քննչական գործողությունները Լևոն Գուլյանի հետ ավարտվել էին։
Մայիսի 12–ին, ժամը 17.00–ի սահմաններում Գուլյանի ընտանիքին հայտնել են, որ նա մահացել է։ Ոստիկանությունից Լևոն Գուլյանի հարազատներին հայտնել են, որ Լևոնը երկրորդ հարկում գտնվող սենյակից փախուստի փորձ կատարելիս ընկել է պատուհանից և մահացել կամ էլ ինքնասպանություն է գործել։
