Մալաթիա-Սեբաստիա վարչական շրջանի 4 փողոցի 48 տան բնակչուհի, թոշակառու Արևհատ Ավետիսյանը լուրջ առողջական խնդիրներ ունի, ապրում է կիսաքանդ, խոնավ տանը՝ հաշմանդամություն ունեցող դստեր հետ:
«Մենք գալիս խնամում ենք երկուսին էլ, սակայն մենք էլ առողջական խնդիրներ ունենք՝ ես սրտի արատ ունեմ, քույրս էլ սրտի հետ կապված խնդիներ ունի: Թոռներ ունենք, ծայրը ծայրին չենք հասցնում»,- «Առաջին լրատվական»-ի հետ զրույցում նշեցին տիկնոջ 2 աղջիկները:
«Վախենում ենք՝ մի օր տունը փուլ գա, իսկ մայրս չի կարողանում տեղաշարժվել, ոտքը կոտրել է, ինսուլտ տարել»:
Աղջիկների խոսքով՝ մայրը 25 հազար դրամ թոշակ է ստանում, իսկ իրենց քույրը հաշմանդամության համար՝ 16 հազար դրամ, այդ երկուսը միասին հազիվ բավականացնում են կոմունալի ծախսերը հոգալուն և մի փոքր սննդի, այնինչ ծախսերը շատ ավելի են. «Տանը նորմալ պետքարան չկա, մորս օրը 2 հատ պամպերս ենք հագցնում, շարժվել էլ չի կարողանում, թանկ դեղեր են նշանակված. թոշակը 25 հազար է, դեղերի փողը՝ ամսական 40 հազար, կտրոններն էլ կարող ենք ցույց տալ»:
Տիկին Արևհատը մինչ հենաշարժողական խնդիրներ ունենալը՝ դիմել է թաղապետարան՝ աջակցության խնդրանքով. տարբեր սոցիալական ծրագրեր կան, որոնց շրջանակներում այնպիսի մարդկանց են նաև օգնում, ովքեր դրա կարիքը այնքան էլ չունեն, իսկ այս տիկնոջը մերժել են:
Աղջիկները պատմեցին, որ իրենց երկու եղբայրները մահացած են, իսկ մյուս եղբայրն էլ ողնաշարի հետ կապված լուրջ խնդիրներ ունի. «Մենք հույս էլ չունենք, որ որևէ բանով կաջակցեն, բայց թող գոնե կոմունալ վճարումներով չխեղդեն. դեկտեմբերից գազը անջատված էր, հազիվ այս ամիս ենք կարողացել վճարել, բայց կտրելով մեր մոր դեղի փողից»:
Առավել մանրամասն՝ տեսանյութում: