Լիբիայում իրականացվող գործողությունների մասին Ռուսաստանի նախագահ Դ.Մեդվեդևի և վարչապետ Վ.Պուտինի տարակարծությունը լայնորեն քննարկվում է ռուսաստանյան և արևմտյան մամուլի հրապարակումներում: Շատ վելուծաբաններ Մեդվեդևի և Պուտինի միջև քաղաքական տարակարծությունը համարում են «հակամարտություն քաղաքական վերին հարթակում»:
Քաղաքագետ Շուշան Խաթլամաջյանի խոսքով, այս տարաձայնությունը չափազանցվում է մամուլում: «Սակայն բնական է նաև այն, որ երկու պաշտոնյաները մրցակցում են և իրենց արտահայտություններով նախ փորձում են շահել իրենց էլեկտորատի համակրանքը` նախագահական ընտրություններից առաջ»,- ասում է քաղաքագետը:
Մեր այն հարցին, թե հնարավո՞ր է արդյոք, որ հայկական քաղաքական դաշտում հայտնվի մեկը, ով իրեն կհամարի Մեդվեդևի ձևավորվող թիմի ներկայացուցիչը մեր երկրում, քաղաքագետը պատասխանեց. «Հնարավոր է ամեն ինչ: Միշտ էլ քաղաքական գործիչները ունենում են կապեր, որոնց հետ հույս են կապում: Սակայն այդ մասին խոսելը հիմա ակտուալ չէ, քանի որ նման բացահայտ հայտարարություններ չեն արվում»: