ՀՅԴ ԱԺ պատգամավոր Լիլիթ Գալստյանը այսօր մեզ հետ զրույցում նշեց, որ իր կարծիքով, Րաֆֆի Հովհաննիսյանը ընտրել է քաղաքական պայքարի զինանոցի ծայրահեղ միջոցներից մեկը, այն է` հացադուլ ։
«Իսկապես սա Րաֆֆի Հովհաննիսյան քաղաքացու, մարդու նկարագրին համահունչ քայլ է, որովհետև ես Րաֆֆիին շատ վաղուց եմ ճանաչում։ Մենք 20 տարվա բարեկամություն ունենք, և իր բարոյական նկարագրի համատեքստում ինձ համար շատ բացատրելի է։ Նաև բացատրելի է իր քայլը քաղաքական այն միջավայրում, այն իրողություններում, որում մենք ապրում ենք։ Պետք է մի քիչ ավելի հետահայաց լինել հասկանալու համար, թե ինչը դրդեց Րաֆֆի Հովհաննիսյանին այդ քայլին։ Ավելին` պետք չէ շատ հեռու գնալ։ Կոալիցիոն վերջին հայտարարությունը, որը քաղաքական դաշտի բևեռացման լրջագույն քայլ էր, որը ես բետոնացում կանվանեի, կանխատեսեց ոչ միայն առաջիկա ընտրությունները, այլ մեր քաղաքական կյանքի առաջիկա 7 տարիները»,- պարզաբանելով Րաֆֆի Հովհաննիսյանի հացադուլի պատճառները` նշեց Լիլիթ Գալստյանը և ավելացրեց, որ ընդհանրապես մարտի 1-ից հետո ընդդիմության և իշխանության միջև քաղաքական երկխոսություն չի ստացվում։
Իսկ այս 3 տարիների ընդվզումները ցույց են տալիս, որ բոլոր քաղաքական խնդիրները, առաջնահերթությունները բախվում են կոալիցիայի լռությանը, որը Լիլիթ Գալստյանը նմանեցնում է խուլերի հետ մենախոսության կամ չինական պատի դեմ պայքարի։ Ինչի արդյունքում միգուցե այս անելանելիությունը Րաֆֆի Հովհաննիսյանին դրդեցին այդ քայլին։
Լիլիթ Գալստյանի խոսքերով, այս ամենի մեղավորությունը գալիս է իշխանությունից, բայց մեր հասարակությունը ևս իր մեղավորության բաժինը պետք է հասկանա։ «Այսպես թե այնպես, մենք բախվում ենք իշխանության ցածր որակի հետ, շարունակական վերարտադրության հետ։
Բայց ինչու եմ ասում, որ հասարակությունն էլ իր մեղքի բաժինը պետք է գիտակցի, որովհետև ընտրությունից ընտրություն հասարակությունը ակամայից ընտրակեղծիքի մասնակից և դերակատար է դառնում։ 5 հազարով հայրենիք է վաճառում։ Երբեմն լռում է, երբեմն հանդուրժում է։ Հետևաբար այս ամենը երկիրը հասցրել է մի իրավիճակի, որը մեզ տանում է գահավիժման ճանապարհով։ Ես կարծում եմ` Րաֆֆի Հովհաննիսյանի այս քայլը նաև ինչ անելու մասին մտածումներ կտա քաղաքական ուժերին, և հասարակության մի մասի մոտ միգուցե որոշ արթնացումներ բերի»,- ավելացրեց Լիլիթ Գալստյանը։