Քրդական Fırat լրատվական գործակալության փոխանցմամբ, Թուրքիայի արևելյան հատվածում (Արևմտյան Հայաստան) գտնվող Բաթման քաղաքում քրդերը խոշոր ցույց են ձեռնարկել, որի կազմակերպիչը քրդական Խաղաղություն և ժողովրդավարություն կուսակցությունը (ԽԺԿ):
Վերջինիս լիդերներից Գյուլթան Քըշանաքը թուրքական իշխանությունների համար ազդարարել է քրդերի 4 պահանջների մասին. մայրենի լեզվով կրթություն ստանալու հնարավորության ընձեռում, ռազմական և քաղաքացիական օպերացիաների ավարտ, քաղաքական բանտարկյալների ազատ արձակում և խորհրդարան մուտք գործելու համար սահմանված նախընտրական 10 տոկոսանոց արգելքի նվազեցում: Քըշանաքի խոսքերից հետո սկսվել է նստացույցը:
Բաթմանում հավաքված շուրջ 20,000 քուրդ ցուցարարները պահանջել են դեմոկրատական ճանապարհով լուծել քրդական հարցը, ինչի համար էլ նրանց կազմակերպած բողոքի ակցիան ստացել է «Դեմոկրատական միտինգ» անվանումը:
Մարդին քաղաքում կազմակերպված ցույցին էլ մասնակցել է 30,000 մարդ:
Հիշեցնենք, որ ներկայումս Դիարբեքիրի դատարանում ընթանում է Թուրքիայում արգելված Քրդստանի աշխատավորական կուսակցությանն (PKK) աջակցելու մեղադրանքով հարուցված ամենազանգվածային դատական գործընթացը, որում հայտնվել է PKK քաղաքական կառույց հանդիսացող «Քրդստանի համայնքների միության» 151 ներկայացուցիչ:
