Թուրքական Akşam թերթի փոխանցմամբ, Հունաստանում գտնվող Լավրիոն փախստականների ճամբարում պատսպարված փախստականները բողոքել են, որ Քրդստանի աշխատավորական կուսակցությունն (PKK) այն վերածել է կազմակերպված հանցավորության կենտրոնի և իրենց տանջարանի:
Ստացված բողոքներից հետո հունական անվտանգության ծառայության աշխատակիցները ստուգումներ են անցկացրել մայրաքաղաք Աթենքում և ձերբակալել են «Ռասիմ» ծածկանունով մեկին, ով ենթադրաբար հանդիսանում է PKK-ի պատասխանատուներից մեկը:
Նշվում է, որ որոշ ժամանակ առաջ «Ռասիմ»-ը Հունաստան է մուտք գործել որպես սիրիական կազմակերպության ներկայացուցիչ, ով զբաղվելու էր` տեղում ներդրումներ կատարելով: Այժմ նա կասկածվում է դրամաշորթության մեջ:
Պարզվել է, որ նրա գլխավորությամբ PKK-ականները 5-7000 եվրոյի դիմաց Իրաքից, Իրանից, Սիրիայից, Թուրքիայից ու Աֆղանստանից մարդկանց տեղափոխել են Հունաստան: Այնտեղ նրանք տեղավորվել են Լավրիոն ճամբարում, ապա մի մասը հեռացել է եվրոպական այլ երկրներ:
Հիշեցնենք, որ իրականում PKK-ն իր համակիրների բանակն ունի Հունաստանում և, մասնավորապես, Աթենքում: Երբ անցյալ տարվա մայիսին Աթենք այցելեց Թուրքիայի վարչապետ Էրդողանը, հունական իշխանությունները, ի պատիվ նրա, նախապես Աթենքի պողոտաներում կախեցին թուրքական դրոշներ, սակայն շուտով հանեցին դրանք` վախենալով, որ հույները, հայերն ու PKK-ի համակիրները կարող են անարգել դրանք:
