Ռազմական փորձագետ Հրաչյա Պետրոսյանցն «Առաջին լրատվական»-ի հետ զրույցում անդրադարձել է Ադրբեջանի դիվերսիոն հետախուզական հարձակումներին, արդյո՞ք ամեն օր հնարավոր է դիվերսիոն հետախուզական որոնում իրականացնել:
«Եթե լայնամասշտաբ մարտական գործողություններ են ընթանում՝ հետախուզական նման գործողություններ ոչ թե ամեն օր, այլ ամեն ժամ է հնարավոր իրականացնել: Ուղղակի եթե հաշվի առնենք, որ մեզ մոտ հարաբերական հրադադար է, մտածելու տեղիք է տալիս, թե ինչի համար էին ամեն օր: Դրա համար ես իմ կարծիքն ունեմ, որը հետևյալն է. առաջին չստացված փորձերից ելնելով՝ իրենց տված մեծաքանակ զոհերը փորձեցին որոշակիորեն կոմպենսացնել, և անընդհատ ոչ թե մի տեղից, այլ մի քանի տեղից փորձեցին դիվերսիոն խմբեր ուղարկել, որպեսզի գոնե մի տեղ իրենք հաջողություն ունենան, որ կարողանան իրենց ներքին դաշտում ներկայացնել, թե հաղթեցին։ Բայց փաստերը ցույց են տալիս, որ նրանք անընդհատ պարտվեցին, զոհերի քանակն էլ գնալով ավելի ու ավելի մեծացավ: Դա պետք է նրանց համար դաս լիներ, սակայն նրանց լրատվական դաշտի ուսումնասիրությունը ցույց է տալիս, որ իրենք երևի թե դաս չեն քաղել»,- ասաց փորձագետը:
Նրա դիտարկմամբ՝ եթե նրանք հարձակվող կողմն են և տալիս են նման մեծաթիվ զոհեր, նշանակում է՝ գործողությունը պլանավորված է եղել ոչ հստակ, ոչ մասնագիտորեն, եղել է շատ ցածր մակարդակի, ինչի հետևանքով հայտնաբերվել են ժամանակին, ընկել են ծուղակը և տվել են բազմաթիվ զոհեր:
«Մենք ուղղակի պետք է հասկանանք, որ ներկա պահին Ադրբեջանը պարզապես իր զինվորների զոհերի գնով ուզում է տեղեկատվական դաշտի միջոցով տարածել, թե՝ տեսեք, Հայաստանը ինչ գործողություններ է կատարում մեր դեմ: Բայց փաստացի զոհերի նման քանակը ցույց է տալիս, որ նրանց մոտ եղել է ոչ մարտական պատրաստավածություն, հապճեպ են գործել, երևի մեզ շատ թերագնահատել են, թերագնահատել են մեր 18 տարեկան զինվորին: Եթե ուշադիր լինեք, նրանց զոհերի հիմնական մասը ոչ թե զորակոչված զինվորներ էին, այլ պայմանագրային, իսկ մերը կանգնած են 18 տարեկան երեխաները»,- ասաց Հրաչյա Պետրոսյանցը՝ հավելելով, որ մենք ունենք հատվածներ, որտեղ պայմանագրային զինծառայողներ են, բայց ներկա պահին դիվերսիոն գործողություներն իրականացվել են այն մարտական դիրքերի դեմ, որտեղ եղել են 18-20 տարեկան զինծառայողներ, որոնք կարողացել են հստակ գործողություններով, ցավոք սրտի՝ շատ դեպքերում իրենց կյանքի գնով կանգնեցնել հակառակորդի դիվերսիոն հետախուզական խմբերին, հասցրել նրանց խոշոր կորուստներ և հետ շպրտել:
Նրա խոսքով՝ մենք այսօր գործնականում ցույց ենք տվել, որ մեր զինվորների բարոյահոգեբանական վիճակը շատ բարձր մակադարկի վրա է, իրենց հետախուզությունն էլ դրանում համոզվեց:
«Նախապատերազմյան իրավիճակ չէ, եթե լինի նախապատերազմյան իրավիճակ, մենք հստակ կիմանանք, որովհետև մինչև պատերազմի սկսվելը որոշակի գործողություններ են կատարվելու համապետական մասշտաբով: Նման բան հիմա չկա, հետևաբար մենք պատերազի ոչ մի փաստ չունենք, որ հնարավոր է՝ առաջիկայում լայնամասշտաբ մարտական գործողություններ սկսվեն, ուղղակի սա տեղային որոշակի փորձեր են իրավիճակը լարված պահելու համար»:
Մեր Զինված ուժերի առավելությունը, ըստ ռազմական փորձագետի, այն է, որ մենք պաշտպանում ենք մեր հայրենիքը, մինչդեռ իրենք չգիտեն՝ ինչի համար են գալիս զոհվում:
Ավելին՝ տեսանյութում:
