Քաշաթաղից օրերս կամավորագրված և սահմանային դիրքեր մեկնած 100 ազատամարտիկները նախօրեին Լեռնային Ղարաբաղի տարբեր զորամասերից զենք են ստացել և զինծառայողների հետ բարձրացել դիրքեր՝ առաջին գծում կանգնելով սահմանապահի կողքին և իրենց փորձով ու գիտելիքներով ոգևորելու նրանց: Այդ մասին «Առաջին լրատվական»-ի հետ զրույցում ասաց ազատամարտիկներից մեկը: Թեև խոսվում է, որ առաջիկա օրերին նրանք պետք է վերադառնան, սակայն ազատամարտիկների խոսքով, իրենք հստակ ժամկետով չեն գնացել և դիրքերում կմնան այնքան, ինչքան պահանջվի:
Իսկ այսօր արդեն 200 կամավորական է ցուցակագրվել և ցանկություն հայտնել մեկնելու դիրքեր: Նրանք անհրաժեշտություն դեպքում կգնան փոխարինելու արդեն իսկ դիրքեր մեկնած իրենց ընկերներին կամ պարզապես կմիանան նրանց և կմնան այնքան, ինչքան պահանջվի:
Նշենք, որ պաշտպանության նախարար Սեյրան Օհանյանը երեկ լրատվամիջոցների հետ զրույցում հավաստիացրել էր, որ մեր բանակն ունակ է իր միջոցներով լուծել իր առջև ծառացած խնդիրները, սակայն կամավորականների ներկայությունը պարզապես կարող է ոգևորել առաջին գծում կանգնած զինծառայողին և էլ ավելի վստահություն ներշնչել: «Կամավորներն անհրաժեշտ է, որ գնան, ոգևորեն մեր զինծառայողներին, կիսվեն իրենց փորձով, բայց մեր բանակն այսօր լիարժեք իրականացնում է իր առջև դրված խնդիրները: Այսօրվա բանակի ցանկացած զինծառայող ունի ռազմական վարպետության այն աստիճանը, գիտելիքները, հմտություններն ու ունակությունները, որոնք քիչ չեն: Պարզապես նրանց մարտական գործողությունների փորձառությունը կարող է լրացնել: Փորձառու զինծառայողի հմտությունները, անցած ճանապարհը և այսօրվա զինծառայողի պատրաստվածության բարձր մակարդակը այն համաձուլվածքն են, որը կարող է բերել միասնական հաջողությունների: Նրանք գնացել են ոգևորելու մեր զինծառայողներին: Այդ միջոցառումներն անհրաժեշտություն են, բայց այսօր բանակն առանց համալրման, առանց լուրջ մարտական պատրաստության բարձր վիճակի բերելու միջոցառումների՝ ունակ է լուծելու իր առջև դրված խնդիրները լուծելու»,- երեկ ասել էր Օհանյանը: