Պաշտպանության նախկին նախարար Վաղարշակ Հարությունյանը համոզված է, որ Հայաստանի ու Ղարաբաղի սահմաններում Ադրբեջանի բանակի հետ միջադեպերը կապ ունեն Ուկրաինայի ներկա իրավիճակի ու Ռուսաստան-Արևմուտք գլոբալ հակամարտության հետ: Ներկայացնում ենք «Առաջին լրատվական» զրույցը ՀՀ ՊՆ նախկին նախարար Վաղարշակ Հարությունյանի հետ:
– Պարոն Հարությունյան, կխնդրեի` որպես պաշտպանության նախկին նախարար գնահատեիք, թե սահմանային գոտում առկա լարված իրավիճակը կարո՞ղ է վերածվել պատերազմի, քանի որ արդեն նման խոսակցություններ կան:
– Այո՜, վիճակը շատ լարված է, եթե համեմատենք նախկին ժամանակների հետ, այսպիսի լարվածություն չի եղել, բայց միևնույն ժամանակ ուզում եմ ասել, որ քիչ հավանական եմ համարում, որ սա վերածվի պատերազմի: Սա պետք է դիտել ընդհանուր համաշխարհային լարվածության կոնտեքստում և կապել Ուկրաինայի իրավիճակի ու Ռուսաստան-Արևմուտք գլոբալ հակամարտության հետ:
– Ուզում եք ասել՝ սահմանային լարվածությունը կապված է գերտերությունների շահերի հե՞տ:
– Այո՜, այո՜: Սա տեղական լարվածություն չի: Սահմանային լարվածությունը գալիս է գերտերությունների գլոբալ հակամարտությունից: Օգտագործվում է տարածաշրջանում այս հակամարտությունը, որպեսզի Ռուսաստանը շեղվի իր հիմնական խնդրից Ուկրաինայում: Ռուսաստանի շահերից չի բխում այսօր որևէ մի հակամարտություն իր սահմաններում: Նույնը կարելի է ասել թե՜ Ուկրաինայի, թե՜ Ղարաբաղի մասով:
– Սակայն Ղարաբաղն այդքան էլ Ռուսաստանի սահմանին մոտ չէ:
– Չէ՜, Ադրբեջանը սահման ունի (Ռուսաստանի հետ.- Մ.Խ.): Մենք Հայաստանի տեսանկյունից չպիտի նայենք այդ հարցին: Եթե Ադրբեջանը սկսում է պատերազմ, դա մոտենում է Ռուսաստանի սահմանին:
– Ձեր կարծիքով` այս իրավիճակը ե՞րբ կհանդարտվի և ե՞րբ ամեն ինչ կավարտվի:
– Ես ասացի, որ իրավիճակը արհեստական է թեժացվում: Նաև Ադրբեջանի շահերից է սա բխում, որ սահմաններում լարվածություն պահի և փորձի խուճապի մատնել Հայաստանի բնակչությանը: Սա բխում է Ադրբեջանի շահերից: Այսօր և՜ Ղարաբաղի, և՜ Հայաստանի հայկական բանակը շատ հստակ, շատ պրոֆեսիոնալ ձևով պատասխանում է ադրբեջանական պրովոկացիաներին: Լարվածությունը կավարտվի այն ժամանակ, երբ իրենք կզգան, որ որևէ հաջողության չեն հասնելու: Իսկ ես համոզված եմ դրա մեջ:
– Ի՞նչ սպասելիքներ կան Սոչիում Սարգսյան-Ալիև հանդիպումից: Ձեր կարծիքով` ի՞նչ կփոխի այդ հանդիպումը:
– Միայն այն, որ այդ հանդիպումը կազմակերպում է Ռուսաստանը, խոսում է այն մասին, որ Ռուսաստանը հիմա փորձում է ամեն ինչ անել, որ այս միջադեպերը չվերածվեն պատերազմի, որովհետև միայն Ռուսաստանն է շահագրգռված այսօր, որ տարածաշրջանում չլինի պատերազմ: