«Պուտինը և Մեդվեդևը շատ ընդհանուր հիմքեր ունեն` երկուսն էլ հատուկ ծառայություններում աճած անձնավորություններ են և շատ նման մտածելակերպով»,- Պուտին-Մեդվեդև հակասություններին անդրադառնալով` «Առաջին լրատվականի» հետ զրույցում կարծիք հայտնեց քաղաքագետ Հրանտ Մելիք-Շահնազարյանը:
Այդուամենայնիվ, Պուտինի և Մեդվեդևի միջև հակասությունները, ըստ Մելիք-Շահնազարյանի, նոր չեն առաջացել, արդեն երկու տարվա պատմություն ունեն.
«Արևմուտքը փորձում է հնարավորինս աջակցել Մեդվեդևին` որպես ավելի հարմար թեկնածուի, որն ավելի պատրաստակամ է բանակցությունների գնալու և շատ հաճախ Ռուսաստանի շահերը զիջելու հանուն ընդհանուր ինչ-որ նպատակների: Այդ խնդիրը կա և ընտրություններին մոտ է՛լ ավելի է խորանալու»:
Քաղաքագետի խոսքերով, Լիբիայի հարցում Պուտինի և Մեդվեդևի միջև հակասություններ իրականում կան: Նրա գնահատմամբ, Պուտինն իր նախագահության տարիներին անընդհատ ագրեսոր արտաքին քաղաքականություն էր վարում, նա փորձում էր ամեն տեղ ունենալ իր ազդեցության ոլորտները, և հենց այդ ժամանակ Ռուսաստանը վերադարձավ Մերձավոր Արևելք, և Լիբիայի շարժումը մեծ վնասներ է հասցնում Ռուսաստանին. «Պուտինը չի ցանկանում աչք փակել այս ամենի վրա, ինչը չի կարելի ասել Մեդվեդևի մասին, ով ավելի մեղմ քաղաքականություն է վարում»:
Սակայն, ըստ Մելիք-Շահնազարյանի, ինչքան էլ Պուտինն ազդեցության լծակներ ունենա, այդուամենայնիվ, իր կարգավիճակով ավելի ցածր է և պետք է հարմարվի Մեդվեդևի դիրքորոշման հետ, ինչն արդեն երևում է, քանզի Ռուսաստանը ձեռնպահ մնաց ՄԱԿ-ի Անվտանգության խորհրդում: