«Նախարարը տեղեկատվություն տրամադրեց, որը հրապարակելու իրավունք չունենք: Ընդհանուր պատկերն այն է, որ երկու կողմերից էլ զոհեր և վիրավորներ շատ կան, ադրբեջանական կողմից՝ ավելի շատ: Եվ վերջին երկու օրերի դիվերսիոն գործողություններն արժանի հակահարված են ստացել ու ետ են շպրտվել: Մեր ունեցած տեղեկությունների համաձայն՝ հիմա իրենք, այսպես ասած, տխուր արդյունքներն են քննարկում: Եվ որ խուճապային իրավիճակ է նրանց մոտ առաջացել, որովհետև իրենք իրենց ծրագրածին չեն կարողացել հասել: Իսկ վերջին դեպքերը մեզ մոտ ամրապնդեց այն վստահությունը, որ դիրքերի ամբողջ երկայնքով անընդհատ ոտնձգություններ են լինում, բայց իրավիճակն ամբողջությամբ վերահսկվում և համարժեք պատասխան է տրվում: Բնականաբար, մեր խնդիրն այն է, որ այս վիճակում չկա իշխանություն-ընդդիմություն տարբերությունը: Եթե մեր սահմաններին վտանգ է սպառնում, բոլորս մեկ մարդու պես առաջին հերթին պետք է կանգնենք մեր բանակի կողքին և մարտունակությունն ամրապնդելու հետ կապված անհրաժեշտ քայլեր կատարենք: Դրա մասին ենք նաև նախնական քննարկում ունեցել, թե ինչով կարող ենք օգնել»,- «Առաջին լրատվական»-ի հետ զրույցում ասաց «Դաշնակցություն» խմբակցության ղեկավար Արմեն Ռուստամյանը՝ պատասխանելով հարցին, թե ինչ են քննարկել պաշտպանության նախարար Սեյրան Օհանյանի հետ հանդիպման ժամանակ:
Հիշեցնենք, որ Ս.Օհանյանն այսօր խորհրդարանում հանդիպել է վեց խմբակցությունների ղեկավարների և Ազգային ժողովի փոխնախագահների հետ: Նրանք քննարկել են Ադրբեջանի դիվերսիոն գործողությունների արդյունքում Հայաստանի և Լեռնային Ղարաբաղի ադրբեջանա-հայկական սահմաններում առաջացած լարված իրավիճակի հետ կապված հարցերը: Իսկ Ա.Ռուստամյանը մեզ հետ զրույցում նաև ասաց, թե հայկական կողմը միջազգային հանրության հետ լուրջ աշխատանք տանելու խնդիր ունի, քանի որ ադրբեջանական կողմը հրաժարվում է խաղաղ բանակցություններից: «Ադրբեջանը դարձել է անբանակցելի: Եվ այս պայմաններում ոչ միայն հայկական կողմը դրանով պետք է մտահոգվի, այլև միջազգային հանրությունն ու առաջին հերթին՝ Մինսկի խմբի համանախագահները»,- ասաց Ա.Ռուստամյանը:
Վերջինիս խոսքերով՝ Լեռնային Ղարաբաղի հակամարտության դեպքում հիմնական խնդիրն Ադրբեջանի՝ իրական բնակացություններից խուսափելու և պատերազմի սպառնալիքն անընդհատ պահպանելու մարտավարությունն է: «Մինսկի խումբը, բնականաբար, ինքնուրույն, առանց կողմերի համաձայնության՝ չի կարող լուծում գտնել: Բայց Մինսկի խումբը համարժեք չի արձագանքում՝ կանխելու համար Ադրբեջանի այն քայլերը, որոնք հակասում են միջազգային գլխավոր նորմերին: Իսկ ավելի բարձր և ավելի կարևոր նորմ կամ իրավունք, քան ուժի և ուժի սպառնալիքի չկիրառումը, այսօր գոյություն չունի: Եվ փորձել իրավիճակը նույն հարթության վրա դնել, Ադրբեջանի պահանջները բավարարել՝ ստատուս քվոյի պահպանման անթույլատրելիություն և այլն, այն սխալներն են, որոնք հանգեցնում են այս վիճակին: Մինսկի խումբը պետք է կարողանա իր արժեքներին վերաբերվել ըստ կարևորության և դրանք պաշտպանել: Դա է, որ այսօր տեղի չի ունենում: Վիճակը փոխելու համար, կարծում եմ, Մինսկի խումբը պետք է ավելի համարժեք գործի և առաջին հերթին վերականգնի իրական բանակցությունները, որը նշանակում է բանակցություններին Ղարաբաղի մասնակցությունը»,- եզրափակեց Ա.Ռուստամյանը: