«Գիտեք, որ բազմաթիվ քաղաքական հակասություններ ունենք, բայց ճակատի գծում կա որոշակի լարվածություն, կան զոհեր, և սա պահն է, որ բոլորը պետք է միասնական լինեն: Բնականաբար, մենք բոլորս այսօր գտնվում ենք նույն խրամատում»,- պաշտպանության նախարար Սեյրան Օհանյանի հետ հանդիպումից հետո «Առաջին լրատվական»-ի հետ զրույցում ասաց ՀԱԿ խմբակցության ղեկավար Լևոն Զուրաբյանը:
Հիշեցնենք, որ այսօր Ս. Օհանյանը մոտ երկու ժամ տևող փակ հանդիպում է ունեցել ԱԺ փոխնախագահների և վեց խմբակցությունների ղեկավարների հետ ու նրանց ներկայացրել վերջին օրերին Ադրբեջանի կողմից իրականացվող դիվերսիոն հարձակումների արդյունքում սահմանին ստեղծված լարված իրավիճակը:
«Եթե մեզ վրա հարձակվում է արտաքին թշնամին, պետք է միասնաբար պատասխան տանք: Եվ առաջին հերթին ուզում եմ, որ մենք մեր հարգանքի տուրքը մատուցենք այն տղաներին, ովքեր այսօր հերոսաբար կռվում են և՝ փայլուն են կռվում ու լուրջ արդյունքներ են ցույց տվել: Ցույց են տվել, որ պատերազմին ադրբեջանցիների՝ տարիների շարունակական պատրաստություններն իրականում արդյունք չեն տվել: Միևնույն է՝ մեր տղաները, մեր զինվորները, բանակը առավելություն ունեն և ռազմաճակատի գծում հստակորեն վերահսկում են իրավիճակը:
Մենք լսեցինք նախարարի տվյալները, նա մանրամասն ներկայացրեց իրավիճակը, միջադեպերի ժամանակագրությունը, թե ինչ է կատարվում ընդհանրապես: Այս պահին կարող ենք ասել, որ Ադրբեջանն ուղղակի քաղաքական նպատակներ է հետապնդում, և մեր ունեցած տվյալներով՝ կարող ենք ասել, որ հայկական բանակը և ԼՂՀ-ում, և Հայաստանում շատ վստահելիորեն վերահսկում է իրավիճակը»,- ասաց Լ. Զուրաբյանը:
Իսկ այդ դիվերսիոն հարձակումներով Ադրբեջանն ի՞նչ քաղաքական նպատակներ է հետապնդում: «Հետապնդում է թե ներքաղաքական, թե արտաքին քաղաքական որոշակի նպատակներ: Ի վերջո՝ տարիներ շարունակ պրոպագանդա են տանում, հայերին ներկայացնում են որպես թշնամի: Եվ այդ պրոպագանդան որոշակի էտապներում չի կարող չվերածվել գործողությունների: Դա այն է, ինչ հիմա կատարվում է:
Ես նաև կցանկանայի ասել, և կարծում եմ՝ դրան կմիանան բոլոր քաղաքական ուժերը, որ ռազմական իրադարձությունների դեպքում ժողովուրդը հանգիստ լինի: Իհարկե, լարված իրավիճակ է, կան զոհեր, ավերածություններ, բայց խուճապի համար որևէ հիմք չկա: Մենք ազգովի պինդ ենք»,- ավելացրեց Լ. Զուրաբյանը:
Իսկ Ազգային ժողովն ինչպե՞ս կարող է աջակցել բանակին կամ ժողովրդին, արդյոք խմբակցությունները, պատգամավորները պե՞տք է զորամասեր այցելեն: «Իհարկե, սա մեր ընդհանուր ազգային գործն է: Քաղաքական ուժերը, քաղաքական վերնախավը պետք է լինեն զինվորների հետ: Եվ մենք ամեն ինչ անելու ենք, որ մեր զինվորն իրեն միայնակ կամ լքված չզգա»,- պատասխանեց Լ. Զուրաբյանը: