Տավուշի մարզի սահմանամերձ Չինարիում կրակոցները բնակիչների համար արդեն սովորական բան են: «Առաջին լրատվական»-ի հետ զրույցում գյուղացիները ընդգծեցին, որ թշնամին ամենօրյա կրակոցներով փորձում է վախեցնել իրենց, որպեսզի գյուղը լքեն:
«Հակառակորդը իր ուզածին երբեք չի հասնի, մենք կառչած ենք մեր հողին, հարկ եղած դեպքում այն կպաշտպանենք, իսկ հակառակորդը դատապարտված է պարտության»,- նշեցին համայնքի բնակիչները:
Ադրբեջանական զինուժը խոշոր տրամաչափի զինատեսակներով կրակում է սահմանամերձ գյուղի ուղղությամբ, սակայն գյուղացին կրակոցներից չի ընկճվում, հակառակը՝ մարտական ոգին է բարձրանում, ասում են՝ որ իրենց թողնեն, ադրբեջանցիներին առանց զենքի էլ ետ կմղեն:
«Մենք ամուր ենք, մեր երկրին տեր ենք կանգնում, հայկական բանակը հզոր է և կանգնած է գյուղացու կողքին, գյուղը երբեք խուճապի չի մատնվել և չի մատնվելու»,- նշեց համայնքի ղեկավար Սամվել Սողայանը՝ վստահեցնելով, որ իրենք նույնիսկ չեն դադարեցրել գյուղատնտեսական աշխատանքները, ցորենը գիշերով հավաքել են. «Թուրքի ուզածն էն ա, որ մեզ խեղճացած տեսնեն, տեսնեն, որ մեր փչացող արտին ենք նայում ու չենք հնձում, բայց անելու ենք՝ ուզում ա կրակեն. չենք վախենում»:
Գյուղի բնակիչները Ադրբեջանին հորդորում էին խելամիտ լինել և խաղաղության հետ չխաղալ: Անկախ Ադրբեջանի ոտնձգություններից՝ գյուղացիները վստահեցնում էին, որ երբեք իրենց օջախները չեն թողնի, և սահմանապահ զինվորը երբեք հարակից գյուղերը դատարկված չի տեսնի:
Առավել մանրամասն՝ տեսանյութում: