Առևտրի համաշխարհային կազմակերպության Գլխավոր խորհուրդը հավանական է մինչև հուլիս վերանայի Ռուսաստանի անդամակցությունը այդ կազմակերպությանը: Այս մասին Интерфакс-ին տեղեկացրել է Եվրահանձնաժողովի առևտրի հարցով տնօրինության գլխավոր տնօրենի տեղակալ Պետեր Բալաշը:
«Մենք հույս ունենք, որ ԱՀԿ-ն այդ հարցը կքննարկի մինչև հուլիս, քանի որ հուլիսից կազմակերպության գրասենյակը արձակուրդ է գնում»,- ասել է նա` հավելելով, որ ԱՀԿ-ին Ռուսաստանի անդամակցության բանակցությունները 95 տոկոսով ավարտված են: Մնացել են մի քանի մանր խնդիրներ, որոնք շատ արագ կարելի է լուծել: Նա ընդգծել է, որ ԵՄ-ն լավատես է բանակցային գործընթացի հաջող ավարտի կապակցությամբ` անգամ նկատի ունենալով ռուս-վրացական բարդ հարաբերությունները:
«Ռուսաստանի և Վրաստանի հարաբերությունները շատ վատ են, ավելի ճիշտ` այդպիսիք գոյություն չունեն: Հարկ կլինի մի շարք հարցեր լուծել: Չնայած Վրաստանի դիրքորոշմանը` մենք ցանկանում ենք, որ Ռուսաստանն անդամակցի ԱՀԿ-ին: Մենք վստահ ենք որ որոշում կգտնվի»,- ասել է Եվրահանձնաժողովի պաշտոնյան ու ավելացրել, որ ԵՄ կողմից վրաց-ռուսական բանակցություններում որպես միջնորդ հանդես է գալիս Շվեյցարիան:
Ռուսաստանը ԱՀԿ-ի հետ անդամակցության բանակցություններ է վարում արդեն 18 տարի: Բանակցությունների ավարտման հավանական ամսաթիվը ռուս պաշտոնյաների կողմից քանիցս հետաձգվել է: Սակայն այժմ, երբ Ռուսաստանը համաձայնության է հասել առանցքային առևտրային գործընկերների` ԱՄՆ-ի ու Եվրամիության հետ, վիճակը կտրուկ փոխվել է:
Ռուսաստանի կառավարության աշխատակազմի ղեկավարի տեղակալ Յուրի Ուշակովը փետրվարին հայտարարել էր, թե Ռուսաստանը նախատեսում է բանակցություններն ավարտել 2011թ.-ի կեսերին:
Վրաստանը արդեն մի քանի տարի է, որ Ռուսաստանի համար դարձել է ամենաբարդ բանակցող կողմը` բազմիցս հայտարարելով, որ մտադիր է արգելափակել ԱՀԿ-ին Ռուսաստանի անդամակցությունը` զանազան երկկողմ տարաձայնությունների պատճառով:
