Մարտի 20-ին Արմավիրի քաղաքապետի ընտրություններից հետո Արմավիրի մարզում արտակարգ իրավիճակ է ստեղծվել: Բավական է ասել, որ ընտրության արդյունքները բողոքարկած քաղաքապետի թեկնածուներից Սևակ Մինասյանին անձամբ հարվածել է ոստիկանության Արմավիրի մարզային վարչության պետը:
Ստեղծված իրավիճակի շուրջ զրուցեցինք Արմավիրի մարզպետ Աշոտ Ղահրամանյանի հետ` պարզելու, թե մարզպետարանը ի՞նչ քայլեր է ձեռնարկում այն կարգավորելու համար, ինչին ի պատասխան մարզպետն ասաց. «Գիտեք, այդ հարցը պետք է իրավապահ մարմիններին ուղղեք, որովհետև իրենք են փաստի առթիվ նախաքննություն իրականացնում: Այս հարցով միայն իրավապահ մարմինները կարող են գնահատականներ տալ»։
Մեր այն դիտարկմանը, թե իրավապահ մարմինները ինչպե՞ս կարող են օբյեկտիվ գնահատականներ տալ, եթե քաղաքապետի թեկնածուներից մեկը նշում է, որ բողոքի գործողությունների ժամանակ, երբ ցանկացել է հանդարտեցնել իրավիճակը, մարզի ոստիկանապետն անձամբ է հարվածել իրեն` պատասխանեց. «Ճիշտ ասած, ես դեպքի վայրում չեմ եղել, հետևաբար թե ինչ է հայտարարում նա, ինչ` մյուսը, ես չեմ կարող մեկնաբանել: Հակառակ դեպքում, իմ մեկնաբանությունները տեղին չեն լինի, որովհետև ես չգիտեմ, թե իրականում ինչ է կատարվել»:
Ի դեպ, Արմավիրի մարզպետից նաև տեղեկացանք, որ ստեղծված իրավիճակի մասին նա Սերժ Սարգսյանի հետ չի խոսել, քանի որ այդ մասին իրավապահ համակարգն է Սերժ Սարգսյանին զեկուցում։
