«Ժառանգություն» կուսակցության առաջնորդ Րաֆֆի Հովհաննիսյանը կարծում է, որ երկրում պետք է նոր իրավիճակ ստեղծվի, և որևիցե մեկը, անգամ հակառակորդը չպետք է հանդգնի «խաղ տալ» մեր սահմանների և մեր գյուղացիների հետ: Րաֆֆի Հովհաննիսյանը «Առաջին լրատվական»-ի հետ զրույցում ընդգծեց, որ միջազգային հանրությունը, ՀԱՊԿ-ը, Ամերիկան, անգամ Ռուսաստանը՝ որպես ռազմավարական դաշնակից, համապատասխան արձագանք չեն տալիս Ադրբեջանի դիվերսիոն գործողություններին հիմնականում մեր իշխանությունների թուլության պատճառով. «Ես տեսնում եմ մեր գործող իշխանության կրավորականությունը, քաղաքականության խեղճությունը, մենք զիջում ենք մեր ինքնիշխանությունը, ազատությունը, բոլոր մայրաքաղաքներում»,- ասաց նա՝ հավելելով, որ հիմա կոչերի ժամը անցել է։ «Մենք տարիներ շարունակ կոչ ենք անում, որ ռազմավարական դաշնակիցը չպետք է վաճառի այնպիսի զենք, որով կկարողանան մեր քաղաքացիական բնակչությանը, զինվորներին հարվածել, դա ռազմավարական դաշնակցություն չէ, ես կարծում եմ, որ Հայաստանը պետք է դուրս գա ճամբարային մտածելակերպից, ունենա նորմալ հարաբերություններ այն երկրների հետ, որոնք պատրաստ են մեզ հետ ունենալ դաշնակցային հարաբերություններ, Ռուսաստանից սկսած մինչև Չինաստան, Ամերիկա, Հնդկաստան, բայց դա ենթադրում է փոխադարձում»,- մանրամասնեց Րաֆֆի Հովհաննիսյանը: Ըստ նրա՝ փոփոխությունները հրատապ են, անհրաժեշտ։ «Ես կարծում եմ, որ շատ շուտ մենք դեմ-հանդիման պիտի գանք այն իրականությանը, երբ ճամբարները մեզ չեն օգնելու, մենք առաջին հերթին մեր շահը պիտի պաշտպանենք Հայաստանով, Արցախով, սփյուռքով»,- ասաց նա՝ հավելելով, որ դրա համար պետք է հասնել սահմանադրական իրավական պետության, Հայաստանի իշխանությունները պետք է փոխվեն, առաջին անգամ ընտրվեն:
Րաֆֆի Հովհաննիսյանի կարծիքով՝ մեր բոլոր իշխանությունների օրոք մենք զիջել ենք ազգային շահը, մեր դիրքերը։ «Օրինակի համար՝ Մադրիդյան սկզբունքները անընդունելի են, պետք ունենք այնպիսի իշխանության, որը կճանաչի Լեռնային Ղարաբաղի անկախությունն իր տարածքային ամբողջականությամբ, դրանից հետո, խնդրեմ, քննարկենք Եվրոասոցացում, թե Մաքսային միություն, որին մենք դեմ ենք, բայց աշխարհաքաղաքական քննարկման մեջ պիտի մտնենք Արցախը Ճանաչած»,- նկատեց «Ժառանգություն» կուսակցության առաջնորդը:
Առավել մանրամասն՝ տեսանյութում։