Վրաստանի վարչապետ Նիկոլոզ Գիլաուրին նամակ է հղել Մալազիայի նախարարների կաբինետի ղեկավարին` խնդրելով աջակցել երկու վրացուհիների ազատ արձակմանը, որոնց մահապատիժ է սպառնում` այդ երկիր թմրադեղերի, մասնավորապես մետամֆետամինի խոշոր խմբաքանակ ներկրելու համար: Այս մասին հաղորդել է ռուսական РБК կայքը` վկայակոչելով Վրաստանի վարչապետի գրասենյակը:
Նամակում խնդրում են հաշվի առնել այդ միջադեպի առնչությամբ Վրաստանում կատարված հետաքննության արդյունքները: Բացի այդ պաշտոնական փաստաթղթեր են ներկայացվել ձերբակալված կանանցից մեկի ամուսնու` ոմն Է. Դավիթիանիի նկատմամբ դատարանի որոշման առնչությամբ:
Գործակալությունը հաղորդում է, որ վերջինս 2010թ-ի նոյեմբերին կամավոր ներկայացել էր վրացական ոստիկանություն եւ խոստովանել, որ իր կնոջ եւ նրա ընկերուհու միջոցով ինքն է կազմակերպել թմրանյութերի տեղափոխումը Թուրքիա եւ Մալազիա: Ամուսնու ասելով` կանայք նույնիսկ չեն իմացել, որ իրենց բեռի մեջ թմրանյութ կա: Թբիլիսիի քաղաքային դատարանը Դավիթիանիին դատապարտել է 15 տարվա ազատազրկման: