Հոլիվուդյան բլուրների մոտ առաջ հաճախ կարելի էր տեսնել ուղղաթիռներ, որոնք փորձում էին հայտնի մարդկանց շքեղ առանձնատների բակերում ֆոտոխցիկով ֆիքսել որոշ մանրամասներ աստղերի կյանքից: Բայց ուղղաթիռներն արդեն անցյալում հայտնվելու վտանգի տակ են, քանի որ հայտնի ամսագրերն արդեն անցնում են անօդաչու ինքնաթիռների կիրառմանը: Այս մասին գրում է The Wall Street Journal-ը:
Թերթին տված մեկնաբանության մեջ հայտնի մարդկանց նկարահանմամբ զբաղվող ֆոտոգործակալության տնօրեն Հարրի Մորգանը հայտարարել է, որ մեծ հաճույքով իր այսօրվա տեսախցիկը կփոխարիներ մերօրյա ժամանակակից տեխնիկայով` տեսախցիկներով զինված փոքր անօդաչու ինքնաթիռներով: «Դա հայտնի դեմքերի սրտում վախ կառաջացնի, որոնք իրենց ծննդյան օրերը նշում են առանձնատներում»:
Այս պահին ԱՄՆ-ում անձնական անօդաչու ինքնաթիռներ չկան: Սակայն Մասաչուսեթսի տեխնիկական համալսարանի դասախոս եւ նախկին ռազմական օդաչու Միսսի Կամինգսն աշխատում է այդօրինակ մեքենա ստեղծելու ուղղությամբ: Կամինգսը, օրինակ, Boeing ընկերության պատվերով ստեղծում է անօդաչու սարքեր, որոնք պիցցայի արկղի չափ են եւ կարող են հետեւել զինվորին ռազմի դաշտում եւ նրան տեղյակ պահել վտանգի մասին:
Թերթի տեղեկություններով, այս տեխնոլոգիաներն արդեն օգտագործվում են ոչ միայն ռազմական ոլորտում, այլեւ խաղաղ պայմաններում եւ այլ նպատակներով: Մանավանդ, որ դրանց գինը կարող է կազմել ընդամենը 100-200 դոլար: