Հայ ազգային կոնգրեսի համակարգող Լևոն Զուրաբյանը, անդրադառնալով ՀՀԿ խոսնակ Էդուարդ Շարմազանովի հայտարարություններին, թե իշխանությունը լայնախոհ է գտնվել և բացել է հրապարակը, սակայն միշտ չէ, որ այդպես կհանդուրժի անօրինականությունը և մի օր էլ կհարվածի ընդդիմությանը գոտկատեղից ներքև, խորհուրդ տվեց տեսնել նման հայտարարությունների սիրահար Ռոբերտ Քոչարյանի վիճակն ու հետևություններ անել:
«Ինչ վերաբերում է գոտկատեղի մասին Շարմազանովի տվայտանքներին, ես չեմ ցանկանում, որ ինքն ընկնի մեկ այլ քաղաքական գործչի վիճակի մեջ, որը նույնպես շատ էր սիրում գոտկատեղից ներքև իջնել»:
Լևոն Զուրաբյանը հստակեցրեց, որ ինքը նկատի ունի Ռոբերտ Քոչարյանին:
«Շարմազանովին կուզեի հիշեցնել, որ ինքը իշխանության խոսնակ է, ոչ թե Կոնգրեսի, և թող իրեն իրավունք չվերապահի Կոնգրեսի անունից հայտարարություններ անելու: Շարմազանովը չէ, որ պետք է որոշի, թե մենք ինչի ենք համաձայն և ինչի համաձայն չենք»,- ասաց պարոն Զուրաբյանը