Ժողճակատ կուսակցության առաջնորդ Ալի Քերիմլիի կողմից Ադրբեջանի իշխանության ու մասնավորապես, առաջին դեմքի հասցեին ուղղված քննադատությունները խիստ անհանգստացրել են պետության ղեկավարին: Իլհամ Ալիեւն արդեն գիտակցում է, որ Ալի Քերիմլիի ելույթները ստվեր են գցել այն թեզերի վրա, ըստ որոնց` Ադրբեջանը տարածաշրջանի առաջնորդ պետությունն է եւ չտեսնված զարգացում է ապրում, այս մասին տեղեկացնում է «Ազադլիգ» պարբերականը: Պարբերականը գրում է, որ Ադրբեջանի գլխավոր ընդդիմադրի կողմից Ի.Ալիեւի հեքիաթները հանրամատչելի լեզվով բնակչությանը բացատրելուց հետո պետության ղեկավարն այլևս խուսափում է ժողովրդի հետ հանդիպելուց, ինչը հերթական անգամ դրսևորվեց գարնանային հեղեղումներից տուժած շրջաններ՝ Սաբիրաբադի, Իմիշլիի եւ Սաաթլիի` վերջինիս կատարած այցի ժամանակ: «Իշխանամետ մամուլը Ի.Ալիեւի` այդ երեք շրջաններ կատարած այցի արդյունքում մեծ ռեպորտաժներ է պատրաստել, ըստ որոնց` պետության ղեկավարը խոսել է հեղեղից տուժած եւ դեռ խնդիրների մեջ խրված այդ երեք շրջանների զարգացումից եւ խնդիրների լուծումից, սակայն ոչ թե բնակչության առաջ, այլ գործադիր իշխանության եւ այլ պետական կառույցների աշխատակիցների: Դա պարզ երևում է թերթերում բերված բոլոր լուսանկարներում: «Ակնհայտ է, որ քաղաքացիները մեկուսացվել են պետության ղեկավարից»,- գրում է թերթը: Իհարկե, դա կատարվել է հենց իր` Իլհամ Ալիեւի հանձնարարությամբ: Չէ՞ որ հեղեղումների աղետից փրկված, մինչեւ կոկորդը խնդիրների մեջ խրված հասարակ քաղաքացու առաջ ինչ-որ զարգացման մասին խոսելը միայն ծիծաղ կառաջացներ…»: