Գիտնականները նորովի են բացատրում թռչունների էվոլյուցիոն հաջողությունը: Փետրավորներին սկիզբ տված տերոպոդ դինոզավրերը դինոզավրերի միակ ճյուղն են, որոնց ներկայացուցիչների չափերը 50 մլն տարվա ընթացքում անդադար փոքրացել են: Հսկաների երկրում թզուկ դառնալով՝ թռչունների նախնիները նոր էկոլոգիական մակարդակի են հասել և սովորել են մագլցել ծառերով, պլանավորել ու թռչել: Արդյունքում, այդ էվոլյուցիոն ինովացիաները թռչուններին օգնել են վերապրել մեծ սողունների համար մահացու երկնաքարային աղետը՝ հաղորդում է Science ամսագիրը:
Ըստ հոդվածի հեղինակների՝ չափերի փոքրացումը երկար ժամանակ տեղի է ունեցել առանց ընդմիջումների: Հենց այդ գործընթացն էլ օգնել է ձևավորել թռչունների անատոմիական առանձնահատկությունը՝ ոչ մեծ գլուխ, մանր ատամներ և ջերմամեկուսիչ փետուրներ:
Հեղինակները համարում են, որ այդ անատոմիական փոփոխությունների շարժիչ ուժը ծառերի վրա վերաբնակեցումն էր: Թռչունների նախնիներին այդ ժամանակ անհրաժեշտ էր ավելի խոշոր ուղեղ, մեծ աչքեր՝ եռաչափ տեսողության համար, ջերմամեկուսիչ փետուրներ և վերջապես՝ երկար առջևի վերջույթներ: