ՀՀ նախկին նախագահ Ռ.Քոչարյանի ընտանիքի գործընկեր կառավարիչ` «GPartners» իրավաբանական ընկերության ներկայացուցիչ Սարգիս Գրիգորյանը այսօր հետաքրքիր տեղեկություն հայտնեց դատական նիստի ընթացքում:
Նա Սեդրակ և Բելլա Քոչարյաններն ընդդեմ «Ժամանակ» օրաթերթի հիմնադիր «Սկիզբ Մեդիա Կենտրոնի» գործի քննության ժամանակ նշեց, որ Քոչարյաններին վերաբերող 2010թ. սեպտեմբերի 25-ին, սեպտեմբերի 29-ին և հոկտեմբերի 7-ին «Ժամանակ»-ում տպագրված հրապարակումներին իր վստահորդները տեղյակ չեն եղել, դրա համար էլ հայցն ավելի ուշ է ուղարկվել դատարան` Քոչարյանների տեղեկանալուց հետո, ինչը հայցվոր կողմը դատարան դիմելու ժամկետի խախտում չի համարում: Քոչարյաններն էլ ընթերցել են հոկտեմբերի 28-ի հոդվածը (որտեղ ներառված է եղել Սարգիս Գրիգորյանի պատասխանը հետևյալ նշումով` «հրապարակվել են… տիկին Բելլա Քոչարյանի և պարոն Սեդրակ Քոչարյանի վերաբերյալ փաստացի անճշտություններ, այսինքն` ոչ ստույգ տեղեկություններ) տեղեկացնելուց հետո:
Պատասխանող կողմի շահերի ներկայացուցիչ Նիկոլայ Բաղդասարյանն էլ հակադարձում է, որ եթե հայցվորները տեղյակ չեն եղել նախկին հրապարակումների մասին ու չեն վիրավորվել, ինչպե՞ս է Սարգիս Գրիգորյանը մինչև հոկտեմբերի 28-ը, առանց իր վստահորդների հետ համաձայնեցնելու հոկտեմբերի 13-ի հերքման տեքստ ուղարկել խմբագրություն` ներկայանալով որպես Քոչարյանների ներկայացուցիչ:
Ստացվում է, որ Քոչարյաններն արդեն տեղյակ են եղել նախորդ բոլոր հրապարակումներին, սակայն բաց են թողել հայց ներկայացնելու մեկամսյա ժամկետը:
Հայցվորներն այս նիստում էլ չնշեցին, թե ինչն են համարում վիրավորանք, ինչը` զրպարտություն, պարզապես մի քանի փաստաթղթեր ներկայացրեցին հրապարակումներում նշված ընկերությունների բաժնետերերի մասին, ու նաև Քոչարյաններին փաստաբանական ծառայություն մատուցելու տեխնիկական առաջադրանքի պատճեն` առանց 3 մլն դրամ վճարման անդորրագրի:
Պատասխանող կողմը ժամանակ խնդրեց ներկայացված ապացույցներին ծանոթանալու, ինչպես նաև 3 մլն-ի ողջամիտ լինելու հարցը Փաստաբանական պալատի միջոցով պարզաբանելու համար, քանի որ վարքագծի կանոնագրքով փաստաբանը պետք է ողջամիտ վարձատրություն պահանջի` հիմնավորելով, թե կոնկրետ ինչ ծախսերի արդյունքում է տվյալ չափի գումար գոյացել:
Դատական հաջորդ նիստը կկայանա ապրիլի 7-ին ժամը 10.00-ին: