Անդրադառնալով ԵԱՀԿ գործող նախագահի վերջին հայտարարությանը շփման գծում առկա դիպուկահարների վերաբերյալ՝ ռազմական փորձագետ Արծրուն Հովհաննիսյանը լրագրողների հետ հանդիպման ժամանակ ասաց, թե ԵԱՀԿ-ից, Եվրոպայի այլ երկրներից եկող բարձրաստիճան պաշտոնյաների խորհուրդները, ցանկությունները երբեմն փաստում են այն մասին, որ նրանք մեր իրականությունը չեն պատկերացնում. «Նրանք չեն հասկանում՝ ինչ է արցախյան հիմնախնդիրը, ինչ է այսօր կատարվում մեզանում, ում հետ նրանք գործ ունեն»:
Քաղաքագետ Հրանտ Մելիք-Շահնազարյանն էլ կարծիք հայտնեց, թե ԵԱՀԿ-ն, ինչպես նաև մի քանի այլ միջազգային կառույցներ, որոնք փորձում են լեգալացնել հարցը, արդյունքներ ցույց տալու խնդիր ունեն. «Այս առումով, եթե նրանց հաջողվի նույնիսկ մեկ զինվորի շփման գծից հետ բերել, դա կներկայացվի որպես լուրջ ձեռքբերում»:
Քաղաքագետի խոսքերով, Ադրբեջանի վարքագիծը որոշ անջրպետ է ստեղծել ԵԱՀԿ-ի և ադրբեջանական իշխանությունների միջև։ Գործ ունենալով հայկական կողմի հետ՝ ԵԱՀԿ-ն փորձում է ազդանշաններ տալ Ադրբեջանին, որ եթե վերջինս շարունակի իրեն նույն կերպ պահել, ապա ԵԱՀԿ-ն կհամագործակցի Հայաստանի հետ: