CNN Türk-ի հաղորդմամբ, ուշագրավ դեպք է գրանցվել Վանի ամրոցի մոտ Քրդական «Խաղաղություն և ժողովրդավարություն» կուսակցության (ԽԺԿ) կողմից կազմակերպված Նովրուզի տոնակատարության ժամանակ:
Թուրք ոստիկաններն անմիջապես անցակետեր են ստեղծել Վանի ամրոցի մոտ հավաքված քրդերի գործողությունները վերահսկելու համար, ինչը հարուցել է
ԽԺԿ-ից ընտրված քուրդ պատգամավոր Օզդալ Ուչերի դժգոհությունը:
Վերջինս իր բողոքն արտահայտել է յուրօրինակ կերպով. նա վերցրել է անցակետում կանգնած թուրք ոստիկաններից մեկի գլխարկն ու հեռացել:
Նշվում է, որ թուրք ոստիկանը դեպքի կապակցությամբ պատրաստվում է Ուչերի դեմ դատական հայց ներկայացնել:
Հիշեցնենք, որ երկրի հարավ-արևելքում գտնվող Շըրնաքի նահանգում Նովրուզի տոնակատարության ժամանակ քուրդ մեկ այլ (կին) պատգամավոր էլ, դժգոհ մնալով թուրք ոստիկանների գործողություններից, իր դժգոհությունն արտահայտել էր Անվտանգության ծառայության գլխավոր կոմիսարին ապտակելով: