«Առաջին լրատվական»-ի զրուցակիցն է ՀԱԿ վարչության անդամ Գրիգոր Ոսկերչյանը:
– Պարոն Ոսկերչյան, երկու ամիս առաջ, երբ ոչ իշխանական քառյակն իշխանություններին ներկայացրեց իր 12 կետերը, միաժամանակ հայտարարեց, որ սեպտեմբերի վերջին հրավիրելու է հանրահավաք` գնահատելու համար, թե իշխանությունները որքանով են կատարել այդ պահանջները: Արդեն ակնհայտ է, որ իշխանությունները դրանք չեն կատարում: Արդյո՞ք քառյակը միայն հանրահավաքով և գնահատականով պետք է բավարարվի:
– Իհարկե, ոչ: Եթե հետևում եք ՀԱԿ-ի գործողություններին, գնահատականներին, թե ուր է ուզում տանել, բնականաբար անիմաստ է միայն հանրահավաքի կամ գնահատականի մասին խոսելը:
– Այդ դեպքում՝ ի՞նչ պետք է անի:
– Իհարկե, այդ հարցում շատ բան կախված է մեր մյուս գործընկերներից: Ակնհայտ է, որ միայնակ կարելի է գնալ միայն ծայրահեղ դեպքում, երբ ուրիշ լուծում չկա: Մեր նպատակը հնարավորինս շուտ ամբողջական իշխանափոխությունն է:
– Միայնակ գնալ ասելով՝ ի՞նչ նկատի ունեք: Այսինքն` միայնակ կգնաք այն դեպքում, երբ քառյակի մյուս ուժերը ձեր հետ միասին իշխանափոխություն չե՞ն պահանջի:
– Իհարկե, դա նկատի ունեմ: Այսինքն` մյուսները, ենթադրենք, այն մակարդակի չեն ներկայացնի իրենց պահանջները, ինչպիսին մենք կցանկանայինք: Օրինակ՝ գործող նախագահի հրաժարականը:
– Մտահոգությո՞ւն ունեք, որ քառյակի որոշ ուժեր Սերժ Սարգսյանի հրաժարականը չեն պահանջի:
– Համենայնդեպս, քանի որ նրանք այդ թեմայով հստակ չեն արտահայտվել, հարցականներ են մնում:
– Տվյալ դեպքում խոսքը հավանաբար վերաբերում է «Բարգավաճ Հայաստան» և Դաշնակցություն կուսակցություններին:
– Բնականաբար, որովհետև «Ժառանգությունն» այդ իմաստով արտահայտվել է:
– ԲՀԿ ղեկավար Գագիկ Ծառուկյանը Հայաստանի ամենախոշոր գործարարներից է: Նա ու իր կուսակցությունը կհամարձակվե՞ն Ս. Սարգսյանի հրաժարականը պահանջել, թե՞ իշխանությունների կողմից ճնշումների ենթարկվելուց կվախենան:
– Իհարկե, ճնշումներ կգործադրվեն, և այդ իմաստով խոշոր գործարարներն ավելի կաշկանդված են: Եվ դժվար է ասել, թե նրանք որքանով նպատակահարմար կգտնեն նման պահանջ ներկայացնել: Մենք ամեն ինչ անում ենք, որ նրանց որոշումները լինեն մերին համահունչ, ամեն ինչ կանենք, որ նրանք միանան մեր ֆունդամենտալ պահանջներին:
– Իսկ Ձեր կարծիքով` ավելի ճիշտ չի՞ լինի, Գ. Ծառուկյանն ու ԲՀԿ-ն իրենց սեփականությունը պաշտպանելու համար միանան ՀԱԿ-ի իշխանափոխությանը, քան թե սեփականությունը պաշտպանեն՝ հրաժարվելով արմատական պահանջներից:
– Սեփականատերը ես չեմ և նրան չեմ ցանկանում խորհուրդներ տալ: Ինքը երևի լավ կիմանա, թե ինչպես պաշտպանի իր սեփականությունը: Իսկ ես կարծում եմ, որ մեր երկրի գլխավոր խնդիրներից մեկն էլ այն է, որ սեփականության իրավունքը դեռ պաշտպանված չէ: Բուրժուա-դեմոկրատական հեղափոխության գլխավոր խնդիրներից մեկը սեփականության լիարժեք պաշտպանության խնդիր դնելն է: Սեփականությունը լիարժեք պաշտպանություն ունենալուց հետո նոր կարող է ազատվել քաղաքական ճնշումներից: Իսկ քանի դեռ սեփականությունը չունի լիարժեք պաշտպանվածություն, միշտ կախված է լինելու քաղաքական ղեկավարությունից և չի կարողանալու, օրինակ, քաղաքական այլ ուղղություններ պաշտպանել: Թվում է, թե մենք կապիտալիստական երկրում ենք ապրում, բայց դատարկ խոսքեր չեն, որ ասում ենք, թե ֆեոդալիզմում ենք: Հենց սեփականության իրավունքն է, որ անընդհատ խախտվում է, և հնարավոր է խլոցին: Կապ չունի, ԲՀԿ-ն է, Ծառուկյանը, թե մյուսներն են: Դա կարող է բոլորին վերաբերել:
– Անգամ ՀՀԿ-ականների՞ն:
– Իհարկե, բավական է, որ ՀՀԿ-ի ներկայացուցիչն իրեն լավ չպահի, սեփականությունը հարվածի տակ կդնի:
