Թուրքական Zaman թերթի հաղորդմամբ, Թուրքիայի տնտեսական քաղաքականության հետազոտությունների հիմնադրամը (TEPAV) ներկայացրել է մի հաշվետվություն, որում նշել է, թե ինչպիսի արդյունքներ կգրանցեն հունիսի 12-ին կայանալիք խորհրդարանական ընտրությունները, եթե խորհրդարան մուտք գործելու համար քաղաքական կուսակցությունների առջև դրված 10 տոկոսանոց նախընտրական արգելքը նվազեցվեր մինչև 4 տոկոսի:
Նշվում է, որ առաջին հերթին դրանից կշահեր քրդական կուսակցությունը, քանի որ նա անպայմանորեն կհաղթահարեր 4 տոկոսանոց նախընտրական արգելքը, ինչը, սակայն, չի կարելի ասել 10 տոկոսանոց արգելքի մասին:
Հիմնադրամի անցկացրած հետազոտությունները ցույց են տվել, որ 10 տոկոսանոց նախընտրական արգելքի դեպքում Թուրքիայի Ազգային մեծ ժողովի (ԹԱՄԺ) 550 մանդատներից 321-ը բաժին կընկնեն Էրդողանի գլխավորած «Արդարություն ու զարգացում» կուսակցությանը (ԱԶԿ), 162-ը` հիմնական ընդդիմադիր, քեմալական ուղղությունը ներկայացնող Ժողովրդա-հանրապետական կուսակցությանը (ԺՀԿ), 35-ը` «Ազգայնական շարժում» կուսակցությանը (ԱՇԿ), 32-ը` քրդական «Խաղաղություն և ժողովրդավարություն» կուսակցությանը (ԽԺԿ, անկախ քուրդ թեկնածուներ):
Մինչդեռ 4 տոկոսանոց նախընտրական արգելքի պարագայում որոշակի կորուստներ են կրում վերոնշյալ թուրքական կուսակցությունները, ինչը, սակայն, չի կարելի ասել քրդական կուսակցության պարագայում: Այս դեպքում ԱԶԿ-ն ստանալու է 9-ով ավելի քիչ մանդատ` 312, ԺՀԿ-ն նույնչափ կորուստ է կրելու` 153 մանդատ, իսկ ԱՇԿ-ն զրկվելու է 5 մանդատից` 30:
Մինչդեռ անկախ ԺՀԿ-ն ստանալու է ևս 13 մանդատ, ընդհանուր առմամբ՝ 45: Բացի այդ, այս դեպքում խորհրդարան մուտք կգործի նաև վերջերս մահացած, ակնհայտ իսլամիստ և Թուրքիայի նախկին վարչապետ Նեջմեթթին Էրբաքանի գլխավորած «Երջանկություն» կուսակցությունը` 10 մանդատ:
Հիշեցնենք, որ 2002 թվականի նոյեմբերի 3-ին Թուրքիայում տեղի ունեցած խորհրդարանական ընտրություններում քրդերը հանդես եկան միացյալ կուսակցությամբ, որը հավաքեց քվեների 6 տոկոսից ավելին, ինչը, բնականաբար, բավարար չեղավ թուրքական խորհրդարան մուտք գործելու համար:
Դրա համար էլ 2007 թվականի հուլիսի 22-ին կայացած վաղաժամ խորհրդարանական ընտրություններում քրդերը փոխեցին իրենց մարտավարությունը և հանդես եկան ոչ թե միացյալ կուսակցությամբ, այլ` առանձին (անկախ) թեկնածուներով: Իսկ դա հանգեցրեց նրան, որ Թուրքիայի արևելյան և հարավարևելյան շրջաններում, ուր գլխավորապես ապրում են քրդեր, նրանք հասան զգալի հաջողության. 21 խորհրդարանական մանդատ:
Հատկանշանական է, որ այն վայրերում, որտեղ քուրդ անկախ թեկնածուները պարտություն էին կրել կամ չէին առաջադրել իրենց թեկնածությունը, ԱԶԿ-ն վստահ հաղթանակ էր տարել` հավաքելով քվեների 60 տոկոսից ավելին: Դա պայմանավորված է նրանով, որ քրդերը, հայերի նման, նախընտրում են իրենց համար չարյաց փոքրագույնը:
