«Առաջին լրատվական»-ի զրուցակիցն է Հայ-ռուսական Սլավոնական համալսարանի տնտեսագիտության և բիզնեսի ինստիտուտի տնօրեն, տնտեսագիտության դոկտոր, պրոֆեսոր Էդվարդ Սանդոյանը:
– Պարոն Սանդոյան, վարչապետ Հովիկ Աբրահամյանի և նրա գլխավորած կառավարության պաշտոնավարումից 3,5 ամիս է անցել: Ճիշտ է, դա բավարար ժամանակ չէ արդյունքներ գրանցելու համար, սակայն բավարար է հասկանալու համար, թե Հ. Աբրահամյանն ուր է ուզում տանել մեր տնտեսությունը: Այդ առումով ի՞նչ զարգացումներ եք նկատել:
– Իսկապես վաղ է խոսել որևէ արդյունքներից: Ես կարող եմ ընդամենը հույսերի մասին խոսել: Վերջին 5-6 տարիներին մենք ձախողել ենք բոլոր ցուցանիշներով: Ամենապարզ հայացքը գլխավոր մակրոտնտեսական ցուցանիշներին ցույց է տալիս, որ մենք նույնիսկ 2008թ.՝ մինչճգնաժամյան ոչ այնքան բարձր կենսամակարդակին դեռ չենք հասել: Տարածված կարծիքներ էին, թե միջազգային ֆինանսատնտեսական ճգնաժամ էր, մենք մեղք չունենք և այլն:
– Բայց այդ միջազգային ֆինանսատնտեսական ճգնաժամը կար:
– Ո՛չ, ես այդ կարծիքին չեմ: Ես միշտ ասել եմ, հիմա էլ եմ մնում այն կարծիքին, որ խնդիրը մեր մեջ է: Մենք շատ կախված լինելով էկզոգեն գործոններից՝ ստացանք բոլոր հարվածները: Ի դեպ, չմոռանանք, որ այն ժամանակվա կառավարությունը նույնիսկ ճգնաժամը չնկատեց կամ նկատեց շատ ուշ, երբ բանը բանից անցել էր: Եթե վերականգնեք անցյալը, կտեսնեք, որ 2009թ., 2008թ. 4-րդ եռամսյակում, երբ աշխարհում արդեն նկատվում էին բացասական միտումները, այստեղ հայտարարվում էր, թե մեզանում ամեն ինչ լավ կլինի, մենք տնտեսության պաշտպանության բոլոր հնարավորություններն ունենք: Հույսը կարծես թե կայանում էր նրանում, որ մենք չլինելով միջազգային ֆինանսատնտեսական համակարգին և շուկաներին խորը ինտեգրված, այդ մեծ ռիսկերը չէինք կլանելու:
– Նախկին վարչապետ Տիգրան Սարգսյանը հայտարարում էր, որ ճգնաժամի մասին չի բարձրաձայնում, որպեսզի բացասական սպասումներ չառաջանան:
– Կային նման օրինակներ: Ես այդ օրերին գտնվում էի Աստանայում, տնտեսական ֆորումի մասնակից էի, և ի զարմանս ինձ` Ղազախստանի կառավարությունը նույնպես նմանատիպ հայտարարություններ էր անում: Առաջինը` եկեք շատ չխոսենք, որ ճգնաժամը չխորանա, երկրորդ ֆենոմենը, որ անցնում ենք ձեռքի ռեժիմի կառավարման, որը ժամանակակից աշխարհում կարող է միայն ժպիտ առաջացնել: Եվ երրորդը` մենք հասկացանք, որ բոլոր առումով խոցելի ենք, որովհետև կտրուկ կրճատվեցին թե՛ ներդրումները, թե՛ մասնավոր տրանսֆերտները, թե՛ ուղղակի ներդրումները, մասնավորապես` շինարարական ոլորտում: Բայց ես ուզում եմ ֆիքսել, որ մենք ունեցանք շատ հաջող տնտեսական բարեփոխումներ 90-ականներին, որոնք, ցավոք սրտի, կանգ առան 2000-ականների սկզբին: 2000-ականներին ունեցանք այդ բարեփոխումների արդյունքը, որոնք, ցավոք սրտի, նույնպես սպառվեցին տարբեր պատճառներով: Մենք խոսում ենք նախորդ կառավարության ձախողումների մասին, բայց ես չեմ կարծում, որ այստեղ առանձին անձինք մեղք ունեն: Կամ եթե նույնիսկ ունեն, դա չէ ամենաէականը, էականը շատ ավելի խորքային է և շատ ավելի ինստիտուցիոնալ: Այո՛, մենք ունեցել ենք տնտեսական աճի երկարատև հատված, որը մեր երկրում զգալիորեն բարելավել է կենսամակարդակը, և սրա մասին չի կարելի չխոսել: Բայց ասել, թե 2000-ականներին մենք գտել էինք զարգացման հարատև բանալին և ճիշտ ուղի էինք ընտրել` այդպես չէ: Ես գտնում եմ, որ գլխավոր թերությունը կայանում է նրանում, որ մենք չենք գտել Հայաստանի պայմաններին բնորոշ տնտեսվարման մոդելը, մենք ազգովի դեռ չենք գիտակցել իրական և ոչ թե նմանակման իմաստով շուկայական տնտեսության առանձնահատկությունները: Մենք շարունակում ենք վատ իմաստով մեր պատմամշակութային արժեքների և ավանդույթների գերին մնալ, մենք մեր կենցաղում հաճախակի ապրում ենք միջնադարյան սկզբունքներով, այլ ոչ թե ժամանակակից աշխարհին բնորոշ հարաբերությունների որակով:
– Որքան հասկացա, կառավարության ու վարչապետի գործունեությունը ձեզ դրական հույսեր չեն ներշնչում:
– Ես այդպիսի բան չեմ ասել: Ես ասացի, որ կա մի շատ դրական գործոն, նախորդ կառավարությունը, որը վաղուց ապացուցել էր, որ ի վիճակի չէ իրականացնել որակյալ փոփոխություններ, գնաց: Եկել է մի նոր թիմ, որը, ես հավատում եմ, կձգտի ինչ-որ բան անել: Մոդելը պետք է փոխել, մարդիկ, անձինք շատ բան չեն կարող փոխել:
– Ի՞նչ մոդելի մասին է խոսքը և ինչպե՞ս պետք է փոխել:
– Ես վերջերս կեսլուրջ-կեսկատակ ուսանողների համար մի հաշվարկ արեցի, հետո ինքս ցնցվեցի դրանից: Վերջին 6 տարիներին մենք ունեցել ենք 3,2 տոկոս տնտեսական աճ, և եթե հաշվի առնենք գնաճն ու դոլարի փոխարժեքի տատանումը, մենք դեռ չենք հաղթահարել 2008թ. ՀՆԱ-ն: Ենթադրենք` տարեկան 3,2 տոկոս աճ ենք ունենում, իսկ G7-ը աճում է 2,5 տոկոսով, Ռուսաստանը՝ 3 տոկոսով, թեև վերջին տարիներին այնտեղ էլ է վիճակը վատթարանում, ապա մենք կհաղթահարենք եվրոպական կենսամակարդակը 240 տարի հետո, Ռուսաստանինը՝ շուրջ 100 տարի հետո: Բայց ակնհայտ է, չէ՞, որ մեզ այսքան ժամանակ տրված չէ, մենք ապրում ենք 21-րդ դարում: ՌԴ-ում կենսամակարդակը 4,5 անգամ բարձր է Հայաստանից: Եվ այսօր ինչու չպիտի հայ երիտասարդը չթողնի և չգնա Հայաստանից: Մենք էլ զարմանում ենք, թե ինչու են հայրենիքը լքում: Իհարկե՝ կլքեն: Այսինքն` մենք դատապարտված ենք ունենալու տնտեսության զարգացման շատ ավելի կատարյալ պայմաններ, ավելի բարձր կենսամակարդակ: Տեսեք, Լատվիայում, Էստոնիայում արտագաղթն ավելի ուժգին է: Եվրաինտեգրումը նրանց անսպասելի մարտահրավերներ բերեց: Նույն Լատվիայի քաղաքացին ունի ԵՄ քաղաքացիություն, ստանում է համապատասխան կրթություն, ազատ է տեղափոխվել ԵՄ ցանկացած երկիր և այդպես էլ վարվում է: Սրանք նոր մարտահրավերներ են, մենք ծանոթ չենք եղել այս ռիսկերի հետ:
– Ի՞նչ է պետք անել:
– Մեր գլխավոր սխալն այն է, որ մենք մոռացել ենք մարդուն: Մեզ համար մարդը երբեք թիրախ չի եղել, կառավարությունը երբեք չի մտածել առանձին մարդու մասին: Եվ եթե մի մարդ կա, որը դժբախտ է, անպարկեշտ վերաբերմունքի է արժանացել, անազնիվ երևույթի զոհ է դարձել, կամ որպեսզի նա կարողանա իրականացնել իր փոքր բիզնեսը, պետությունը պետք է ամեն ինչ թողնի և զբաղվի այս մարդու պաշտպանությամբ: Երբեք ոչ մի անգամ այս 23 տարում պետությունը անձի մասին չի մտածել: Եվ երկրորդը` տեսանելի ապագայում մենք շարունակելու ենք մնալ սահմանափակ կոմունիկացիոն հնարավորությունների դաշտում, փակ սահմաններով, ծովից հեռու: Տեսանելի ապագայում կարծես թե մենք չենք ունենալու հարևանների հետ մեր հիմնախնդրի հանդարտ լուծում, և մեր միակ ռեսուրսը, որի մասին մենք քիչ ենք խոսում, սփյուռքահայությունն է` իր կարողություններով, մասնագիտական գիտելիքներով և ֆինանսական ռեսուրսներով, ընդ որում` փոքրից մինչև խոշորը: Մեր ռեսուրսը միայն խոշորները չեն, ամբողջ հայությունն է, և շատ քիչ ազգեր ունեն նման հնարավորություն: Մենք երբեք չենք կարողացել այդ ռեսուրսն օգտագործել: Կառավարությունում վերջերս են սկսել խոսել ներդրումային հիմնադրամ ստեղծելու մասին, որ ներդրումները համահայկական բնույթ ստանան, բայց սրանք բարդ երևույթներ են, և դեռ գործընթացը չեմ տեսնում: Մենք ունենք երևույթներ, որոնց հաղթահարումը ես չեմ տեսնում: Ասենք՝ խոշոր բիզնեսի, օլիգարխիկ բիզնեսի, ոչ մրցակցային տնտեսության և ոչ մրցակցային քաղաքական դաշտերի դիվերսիֆիկացիայի լուծման ճանապարհը: Այս խնդիրներն այլևս միայն ֆինանսական կամ տնտեսական մեթոդներով չես լուծի:
– Ինչպե՞ս է անհրաժեշտ լուծել:
– Քաղաքական կամքի խնդիր կա, պարզ խոսենք: Սա երկրի առաջին դեմքի կամքից է կախված և ոչ միայն իրենից: Մինչդեռ մենք 23 տարի ապրում ենք այս մոդելում
– Այս 23 տարիների ընթացքում չի՞ եղել այդ կամքը:
– Չեմ կածում: Կարծում եմ, որ երեք նախագահներն էլ հարմարվել են, որովհետև շատ հարմար է աշխատել խոշոր բիզնեսի հետ: Տեսեք՝ ինչով են զբաղված հայերը ՌԴ-ում, Ղազախստանում, Ուկրաինայում, Եվրոպայում: Հայ մարդը կարծես թե բնազդաբար ծրագրված է աշխատելու, ընդ որում՝ փոքր բիզնեսում: Պետք է փոքր բիզնեսն ազատել բոլոր հարկատեսակներից, բյուջեն ընդամենը 12 մլրդ դրամ կկորցնի: Դա շատ չնչին գին է և բյուջեի համար մեծ գումար չէ: Դուք տվեք մարդկանց հնարավորություն և կտեսնեք, թե ինչ կկատարվի: Իմ հաշվարկներով` հենց առաջին տարում բնակչության շուրջ 10 տոկոս հավելյալ աշխատատեղ կստեղծվի:
– Ներսում չկա այդ ամենն իրականացնելու քաղաքական կամքը, տնտեսությունը վատ է, մարդիկ արտագաղթում են և այլն: Իսկ մենք ի՞նչ ակնկալիքներ ունենք դրսից, հատկապես այն երկրներից, որոնցից կախված է մեր տնտեսությունը: Օրինակ` ՌԴ-ից, որի նախաձեռնած Եվրասիական տնտեսական միությանն էլ ցանկանում ենք անդամակցել: Հայտնի է, որ ՌԴ տնտեսությունն այսօր վատ վիճակում է գտնվում, և այնտեղ անգամ զրոյական աճը կարող է դրական համարվել:
– Ես կողմնակից եմ ցանկացած ինտեգրացիայի: Ակնհայտորեն դա միայն կարող է դրական լինել մի պայմանով, որ մենք դրան պատրաստ լինենք: Պատրա՞ստ ենք մենք այսօր, ես կարծում եմ՝ ոչ: Մենք սիրում ենք մեր դարդն ու ցավը տեղափոխել մեկ այլ ազգի կամ պետության վրա: Հարևանները լավը չեն, պատմությունը լավը չէ, Աստված մեզ չպահպանեց: Բոլորը մեղավոր են` բացի մեզանից: Իրականում այդպես չէ: Մենք ենք մեր տնտեսությունը հասցրել այս աստիճանի, մենք ենք այս նվազ ռեսուրսների հասցրել մեր հնարավորությունները, մենք ենք ապրում այս ցածր կենսամակարդակով, մենք չենք ուզում զարգանալ, մենք պատրաստ չենք լրջագույն որակական փոփոխությունների: Հիմա չունենք տնտեսություն, արտահանելու նոր ապրանքատեսակ, ինչ որ ունենք, հիմա էլ ենք արտահանում: Նոր ինտեգրացիան այս իմաստով մեզ համար լայն պայման չի ստեղծում:
– Այսինքն` այնքա՞ն էլ ճիշտ չեն մեր իշխանությունների հայտարարությունները, թե ԵՏՄ-ին ինտեգրվելով մեր առջև հսկայական շուկա կբացվի:
– Ճիշտ են ասում: Բայց եկեք ճիշտ հասկանանք. ՌԴ-ն գազը և նավթը մեզ կարտահանի առանց տուրքերի: Սա բավականին էական նշանակություն կունենա մեզ համար, այս ռեսուրսն ավելի էժան կգա, և մեր օլիգարխներն ու ցանցային բիզնեսն ավելի մեծ շահույթ կունենան: Հետո ինչ:
– Բայց այնպես չէ, որ մենք «Գազպրոմ-Արմենիա» ընկերությունից այդ գազը էժան ենք ստանում:
– Համաձայն եմ, դա այլ խոսակցություն է: Բայց հաշվարկներ կան, որ այդ ռուսներից հենց առաջին տարում մենք մոտ 350 մլն դոլար պլյուս ենք ստանում, բայց թե մենք որքան վնաս ենք կրելու, դեռ չի հաշվարկված:
– Որը գուցե շատ ավելի՞ն է:
– Գուցե, իմ կարծիքով՝ այո: Այստեղ կա նաև միջին կշռված սակագների խնդիրը՝ 2,5 տոկոսից անցնում ենք 7,5-ի: Այնուամենայնիվ տեղի արտադրողը կհայտնվի ոչ բարենպաստ մրցակցային պայմաններում: Պետք է նաև հաշվարկենք, թե ինչ վնաս կկրենք երրորդ երկրներից ներմուծվող ապրանքների գծով, որոնք կթանկանան: Մենք հայ-վրացական հարաբերությունների խնդիր կունենանք: Նրանք գնում են մի տնտեսական մոդելի, մենք՝ մեկ այլ: Հատկապես, որ այս բոլոր տարիներին մենք այդպես էլ վրացիների հետ աշխատել չսովորեցինք: Այդտեղ շատ անելիքներ ունենք և մեծ հնարավորություններ ունենք: Այնտեղ կան մարդիկ, որոնք պատրաստ են մեզ հետ եղբայրաբար համագործակցել: Ես շատ եմ հարգում մեր սպորտսմեններին, բայց մենք պետք է հասկանանք, որ կառավարություն, պետություն, պետականություն գաղափարները վերացական չեն: Այդ դեպքում ինչու ենք մենք շախմատի կամ ֆուտբոլի թիմերում պրոֆեսիոնալ շախմատիստներ կամ ֆուտբոլիստներ ներգրավում: Եկեկ բերենք կուսակցականների, լավ տղերքի: Ինչու եք դիվանագիտության նման պատասխանատու ոլորտում նշանակում մի մարդու, ով դիվանագիտության հետ ոչ մի առնչություն չունի: Եվ մենք այսպես մանկական ձևով տանուլ ենք տալիս մեր պետությունը և բացառիկ հնարավորություն ունենալու պատմական պահը:
– Իրանը ցանկանում է Հայաստանի տարածքով Եվրոպա արտահանել իր էներգետիկ ռեսուրսները: Կարծում եք` տարածաշրջանային ու աշխարհաքաղաքական այս բարդ իրավիճակում դա հնարավոր կլինի՞:
– Մենք այստեղ ժամանակին մեր սխալներն արդեն արել ենք, կոմունիկացիոն շրջափակում ենք ստեղծել, այնպես որ` այստեղ ասելիք չկա: Իրանի գործոնը ես այստեղ էական չեմ համարում: Մի 50 տարի էլ դրա մասին կխոսենք: Մենք վաղուց մեր այդ կոմունիկացիաները տվել ենք «Գազպրոմին», ինչը կարելի էր չանել:
– Դա այլևս անդառնալի՞ է:
– Կարծում եմ՝ այո՛:
– Մեր իշխանությունները չե՞ն կարող բարկանալ և այլընտրանք գտնել:
– Ո՛չ, չեն կարող: Մենք այլևս բարկանալու իրավունք չունենք, բայց ես կարծում եմ, որ շատ դրական բաներ կան: Պատմությունը մեզ ապացուցել է, որ գոնե խոշոր խաղացող մի բարեկամ պետություն պետք է ունենանք, հիմա մենք ուզում ենք դրանի՞ց էլ զրկվել: Այն, ինչ կարող է իրեն թույլ տալ Վրաստանը, ցավոք սրտի, չի կարող թույլ տալ Հայաստանը: Մեզ խանգարում է մեր սեփական պատմությունը, կարծրատիպերը, մենթալիտետը, շատ բան է խանգարում:
