Այսօր ՕՐԱՔԼ օգտատերերի հայկական խմբի կոնֆերանսին ներկա էր Հայաստանում ԱՄՆ դեսպան Ջոն Հեֆերնը, որը ՀՀ-ում բարձր տեխնոլոգիաների ուսուցման և հետազոտման գործում ունեցած նշանակալի ներդրումների համար Գերազանցության պարգև շնորհեց Ազգային ակադեմիային:
ՕՐԱՔԼ-ի նպատակն է օգտատերերի և տեղեկատվական տեխնոլոգիաների, կրթության, գիտության, արտադրության և բիզնեսի կառավարման ոլորտի մասնագետների համախմբումը` ստեղծագործական, մասնագիտական հետաքրքրությունների հիման վրա, նրանց մասնակցության ապահովումը հանրապետության տեղեկատվական տեխնոլոգիաների, գիտության, կրթության ոլորտների զարգացման հիմնական ուղղությունների մշակմանը և իրագործմանը, վերջիններիս իրավունքների և հետաքրքրությունների պաշտպանությունը:
ՀՀ Էկոնոմիկայի նախարարի տեղակալ Էմիլ Տարասյանը նշեց, որ կա կառավարության և ՕՐԱՔԼ-ի միջև ստորագրված համաձայնագիր: Առաջին հերթին պետք է ունենանք ՕՐԱՔԼ-ի հայաստանյան ներկայացուցչություն, որ կարողանանք ավելի արդյունավետ աշխատել:
Լրագրողները հետաքրքրվեցին էկոնոմիկայի փոխնախարարից՝ ԵՏՄ համաձայնագրի ստորագրումը ո՞ր փուլում է. «Ես քանի որ չեմ տիրապետում և ներգրավված չեմ ՄՄ գործընթացների մեջ, լավ կլինի` այդ հարցը ինձ չուղղեք, քանի որ պրոցեսում ներգրավված չեմ»:
Ռուսաստանի նկատմամբ Արևմուտքի պատժամիջոցները ինչքանո՞վ կանդրադառնան Հայաստանի վրա հարցին էլի ի պատասխան փոխնախարարը կրկնեց, որ դա իր համակարգման ոլորտում չէ, և խնդրեց հարցեր տալ կոնկրետ այս միջոցառումից:
Խոշոր գործարարների անուններ չկային ֆինանսների նախարարության հրապարակված հաշվետվության մեջ. այս առնչությամբ հարցն էլ փոխնախարը չթողեց ավարտեն. «Կրկնվեմ. ես մնացած հարցերում խնդրում եմ` մի ուրիշ անգամ, իմ համակարգման ոլորտից կլինե՞ն հարցեր` խնդրեմ»:
Էմիլ Տարասյանը նշեց, որ Հայաստանում ՕՐԱՔԼ-ի ներկայացուցչություն բացելու բանակցություններ են ընթանում:
ՕՐԱՔԼ խմբի հիմնադիր Ռիչարդ Բեզջյանն էլ նշեց, որ ՏՏ ոլորտում բարձր ցուցանիշներ ունենք, սակայն ոչ այնքան բարձր. «Այսօր մենք ուզում ենք այն բարձրացնել, և համաշխարային մակարդակի հասցնել և որակը լավացնել, որպեսզի թե ներքին շուկան սկսի օգտագործել Հայաստանի մեջ ստեղծված ծրագրերը, և նաև Հայաստանից դեպի դրսի աշխարհ տարվեն ծրագրերը: