Դերասան Վարդան Պետրոսյանի գործով տուժողների փաստաբան Ռուբեն Բալոյանը հերքում է պահանջում «Լրագրողներ հանուն մարդու իրավունքների» ՀԿ նախագահ, իրավապաշտպան Ժաննա Ալեքսանյանից՝ «Արա ես քո հետ տղայականով եմ խոսում, ոչ թե որպես փաստաբան» վերնագրով հոդվածի համար:
Ըստ հրապարակման՝ Վարդան Պետրոսյանի գործով դատական նիստի ավարտից հետո դատարանի բակում, մոտենալով արդեն ավտոմեքենայում գտնվող փաստաբան Նիկոլայ Բաղդասարյանին, սպառնալից տոնով Բալոյանը նման արտահայտություն է արել, և թեպետ Ն․ Բաղդասարյանը չի արձագանքել Բալոյանին, վերջինս, սակայն շարունակել է սպառնալիքներն ու մեղադրանքները: Ավելին՝ նրան է միացել տուժող կողմը՝ հայհոյանքներ ու անեծքներ ուղղելով Վարդան Պետրոսյանի հարազատների հասցեին:
Այս ամենը դատարանի բակում արձանագրելով՝ լրագրող Ժաննա Ալեքսանյանը նման հոդված է տպագրել, որն էլ, ըստ Ռուբեն Բալոյանի, արատավորում է իր պատիվը, արժանապատվությունը և բարի համբավը:
«Առաջին լրատվական»-ի հետ զրույցում Ժաննա Ալեքսանյանն ասաց, որ իր հեղինակած հոդվածին հերքում տպագրել չի պատրաստվում: Նա ընդգծեց նաև, որ իրավիճակն անսպասելի է եղել, այդ պատճառով էլ ինքը չի հասցրել ձայնագրություն անել։
«Ես չեմ հրաժարվում իմ տպագրած հոդվածից: Ռուբեն Բալոյանն այդկերպ է խոսել մյուս կողմի փաստաբանի հետ՝ ես դա հիշում եմ: Այլ լրատվամիջոցներում ևս գրվել է, որ փաստաբանների միջև սկանդալ է եղել, բայց նրանք արձանագրել են , որ դատական նիստից հետո դատարանի բակում վիճաբանություն է եղել՝ միայն այդքանը: Ես ինքս լսել եմ, ոնց էր նա Նիկոլայ Բաղդասարյանին ասում այդ բառերը, որի համար հերքում է պահանջում: Նրա խոսքերով՝ ինքն այդպիսի բան չի ասել»,- ասաց Ալեքսանյանը։
Զրուցեցինք նաև Վարդան Պետրոսյանի փաստաբան Նիկոլայ Բաղդասարյանի հետ: Նա ասաց, որ Բալոյանն իր հասցեին վիրավորանք է հնչեցրել, ինչին ինքը չի պատասխանել․ «Ինձ համար անհասկանալի իրավիճակ է ստեղծվել, Ռուբենն առանց պատճառի ինձ վիրավորեց, Ժաննա Ալեքսանյանը, որն այդ պահին այդտեղ էր գտնվում լսեց ու հրապարակեց վիրավորանքը, Փաստաբանների պալատի նախագահ Արա Զոհրաբյանը վարույթ հարուցեց, վերջում ստացվեց, թե ես եմ մեղավոր: Բալոյանն ասում է, թե Նիկոլայ Բաղդասարյանն է մեղավոր… Որտե՞ղ էր Նիկոլայ Բաղդասարյանը , որ մեղավոր լինի: Ինձ վիրավորել են, լրագրողը լսել հրապարկել է, իսկ դիմումի մեջ Բալոյանն ընդգծել է, թե ես եմ մեղավոր»:
Փաստաբանն ընդգծեց, որ ոչ ոք չէր ակնկալում, թե Բալոյանն իրեն կվիրավորի, բոլորը պատրաստվում էին տուն գնալ, դատական նիստն ավարտվել եր: Նույնիսկ լրագրողները չեն սպասել, որ նման բան կլինի, հետևաբար և ոչ ոք չի ձայնագրել և չի լուսանկարել․ «Սա փաստաբանական համայնքի ներսի խնդիր է, ոչ թե արտաքին աշխարհի: Ես ամեն ինչ կանեմ, որ սա չդառնա հանրության քննարկման հարց»,- իր խոսքը եզրափակեց Նիկոլայ Բաղդասարյանը: