CNN Türk-ի փոխանցմամբ, Թուրքիայի նախագահ Աբդուլլահ Գյուլը, մասնակցելով Թուրք արդյունաբերողների ու գործարարների միության (TÜSİAD) հիմնադրման 40-րդ տարելիցի կապակցությամբ անցկացվող արարողակարգին, հայտարարել է նոր Սահմանադրության անհրաժեշտության մասին.
«Անհրաժեշտ է, որ մենք Թուրքիան դնենք նոր ուղեծրի մեջ: Մենք բոլորս համակարծիք ենք, որ Թուրքիային անհրաժեշտ է ունենալ նոր Սահմանադրություն: Այդ դեպքում Թուրքիան կդառնա էլ ավելի ժողովրդավար, աշխարհիկ, սոցաիալական ու իրավական պետություն:
Նոր Սահմանադրությունը կլինի առավել ազատ, քան նախկինը: Այս դեպքում արդեն դրանում չեն ներգրավվի ռեակցիոն տարրերը: Միակ ռիսկը կայանում է մեթոդաբանության մեջ:
Նոր Սահմանադրության մշակման գործընթացը չի վերաբերում միայն քաղաքական կուսակցություններին, դրան պետք է մասնակցեն նաև հասարակական կազմակերպությունները: Այս խնդիրը կմնա հունիսին կայանալիք խորհրդարանական ընտրություններից հետո»:
Հիշեցնենք, որ Թուրքիայի ներկայիս Սահմանադրությունն ընդունվել է 1980 թվականի սեպտեմբերի 12-ին Թուրքիայի Հանրապետության պատմության մեջ տեղի ունեցած ամենաարյունալի ռազմական հեղաշրջման արդյունքում:
Հեղաշրջման նախապատրաստման համապատասխան հիմքի ստեղծման համար ձախ և աջ արմատականների միջև մինչև հեղաշրջման առավոտ հրահրված բախումներում զոհվեց 2000 մարդ, հեղաշրջման արդյունքում բանտարկվեց 650.000 մարդ, ոստիկանությունում հարուցվեց 1.683.000 գործ, քաղաքական պատճառներով հարուցված 210.000 գործի շրջանակներում դատարանում հայտնվեց 230.000 մարդ, 517 մարդ ստացավ առավելագույն պատժաչափ, միևնույն ժամանակ այդպիսի պատժաչափը սպառնում էր 7000 հոգու, 388.000 մարդ զրկվեց անձնագրից, աշխատավայրից վտարվեց մոտ 30.000 մարդ (նրանց ասացին, որ իրենք վտանգավոր են), որոնցից 20.000-ը ներկայացնում էին կրթական համակարգը, 14.000 մարդ զրկվեց քաղաքացիությունից, մոտ 30.000 մարդ փախավ երկրից, գրաքննության նկատառումներից ելնելով` արգելվեց 937 ֆիլմ, 400 լրագրողների առաջադրվեց 4000 տարվա բանտարկության մեղադրանք, 300 օրվա ընթացքում թերթերը չհրապարակեցին հետաքննության մասին նյութեր, ոչնչացվեց 37.000 տոննա թերթ ու հանդես:
Հեղաշրջումից հետո` 1981 թվականի հունիսի 29-ին, թուրքական ռազմական խունտան ընտրեց 160 խորհրդատուի, որոնց հանձնարարեց զբաղվել նոր Սահմանադրության մշակմամբ: Վերջիններս առաջ քաշեցին 800 նոր օրենքներ:
1982 թվականի նոյեմբերի 7-ին նոր Սահմանադրությունը դրվեց հանրաքվեի ու ստացավ մասնակիցների 92 տոկոսի աջակցությունը:
Դրանից 2 օր անց էլ ռազմական հեղաշրջման կազմակերպիչ, Գլխավոր շտաբի պետ, գեներալ Քենան Էվրենը 7-ամյա ժամկետով նշանակվեց Թուրքիայի նախագահ: