Մամուլի ազգային ակումբը Ազգային ժողովրդավարության ինստիտուտի հետ համատեղ կազմակերպել էր քննարկում` «Գենդերային օրենսդրական փոփոխությունները. դրանց իրավական եւ հասարակական-քաղաքական հնարավոր հետեւանքներն ու արդյունքները» թեմայով: Քննարկմանը հրավիրված ԱԺ պատգամավոր, «Բարգավաճ Հայաստան» կուսակցության անդամ Գոհար Ենոքյանը հիշեց, թե ինչպես 1995թ. Պեկինում կայացած մի համաժողովի ժամանակ լսել է տարբեր երկրներ ներկայացնող մի քանի տասնյակ կանանց ելույթները եւ զարմացել: Նրանք խոսել են իրենց ամուսինների եւ սկեսուրների դաժանությունից, ինչը ԱԺ պատգամավորը չէր հանդիպել մեր երկրում: Սակայն ավելի ուշ կարդացել է հայ կանանց շրջանում անցկացրած մի ուսումնասիրություն, որում կանանց 47 տոկոսը նորմալ է վերաբերվել ամուսնու կողմից ծեծի արժանանալու փաստին: Գոհար Ենոքյանը նկատում է, որ այդ մտածողությունը սկզբնավորվում է ընտանիքներում: «Երբ աղջիկն է չարություն անում, նրան պատժում են, իսկ տղային` ոչ»,- ասաց նա: Գոհար Ենոքյանը նշեց նաեւ, որ ԽՍՀՄ փլուզումից հետո կանայք ավելի ճկուն գտնվեցին, ընտանիք պահելու համար թափանցեցին բիզնես ոլորտ, մինչդեռ շատ տղամարդիկ չդիմացան եւ կոտրվեցին: