Տիգրան Թորոսյանը, անդրադառնալով Ընտրական օրենսգրքի փոփոխություններին, նշեց, որ այս շաբաթ կրկին անդրադարձան այս խնդրին, սակայն կարևոր է այլ բան. իսկապես նախագիծը հաշվի առնո՞ւմ է այն խնդիրները, որոնց բախվել ենք ընտրական գործընթացներում։ Նա առանձնացրեց երկու հանգամանք:
Նրա խոսքերով, ներկայացված խնդիրների ճնշող մեծամասնությունը տեխնիկական է և, նրա համոզմամբ, փոփոխություններ չի բերի: «Օրինակ`հանձնաժողովը փոփոխությունների արդյունքում պետք է ունենա մեկ անձ, մեկ կին»,- ասում է Տ.Թորոսյանը:
«Ճիշտն ասած՝ որ հանձնաժողովի աշխատանքները պետք է գենդերային բաժանումներով որոշվեն, սա որակի մասին չի խոսում: Նույնը խորհրդարանում կանանց ընդգրկվածությանն է վերաբերում. կանանց թիվը կլինի շատ, թե քիչ, դրանից ո՛չ խորհրդարանի, ո՛չ ընտրությունների որակը չի փոխվի, իսկ ընտրական նախագծում համամասնական տեղերի թիվը 100 տոկոս կլինի, թե 70 տոկոս՝ դրանով էլ ոչինչ չի փոխվի, որովհետև այսօր, պետք է խոստովանել, կուսակցություններ ներկայացնողների 90 տոկոսը որևէ կապ չունեն տվյալ կուսակցության հետ, չեն ունեցել և չեն ունենա»,- ասաց Տ. Թորոսյանը:
Ինչ վերաբերում է ՀՅԴ խմբակցության ներկայացրած Ընտրական օրենսգրքի նախագծին` Տիգրան Թորոսյանը ասաց, որ այն շահեկանորեն այլ տեսք ունի, որովհետև հեղինակները ձևակերպել են խնդիրները և առաջարկել դրանց լուծումները:
Հերթական անգամ անդրադառնալով Ընտրական օրենսգրքին՝ Տիգրան Թորոսյանը եզրափակեց. «Ցավոք, այս նախագծի քննարկումից և ընդունումից ոչինչ չի փոխվելու: Լինելու է այնպես, ինչպես ասում էր Ռուսաստանի նախկին վարչապետը. այս անգամ էլ ցանկանում էինք, որ լինի ավելի լավ, բայց կլինի ինչպես միշտ»:
