Ռուսական lenta.ru կայքը, վկայակոչելով անգլիական The Daily Mail-ին, նշել է, թե որ դեպքում Թուրքիայի ֆուտբոլային ընտրանու գլխավոր մարզիչ Գուուս Հիդդինգը պատրաստ կլինի հրաժարական տալ:
Հոլանդացի մարզիչը հայտարարել է, որ եթե Թուրքիայի ընտրանին առաջիկա երկու խաղերում չվաստակի 6 միավոր, ապա ինքը հրաժարական կտա:
Նշվում է, որ Եվրո 2012-ի նախընտրական մրցաշարում Թուրքիայի ընտրանին մարտի 29-ին սեփական դաշտում ուժերն է չափելու Ավստրիայի հետ, իսկ հունիսի 3-ին արտագնա հանդիպում է անցկացնելու Բելգիայի հետ:
Հիդդինգի խոսքերով, հանուն Եվրո 2012-ի եզրափակիչ մրցաշարում հայտնվելու պայքարը շարունակելու համար իրենց անհրաժեշտ է ամեն գնով հաղթանակ տանել այդ երկու հանդիպումներում, հակառակ դեպքում ինքը պատրաստ է իր հրաժարականի դիմումը ներկայացնել Թուրքիայի ֆուտբոլի ֆեդերացիային:
Հիշեցնենք, որ Թուրքիայի ընտրանին ընդգրկված է Եվրո 2012-ի նախընտրական մրցաշարի «Ա» խմբում, ուր անցկացրած 4 խաղերից հետո վաստակել է ընդամենը 6 միավոր և հանգրվանել է խմբի երրորդ հորիզոնականում:
Հիդդինգի և Թուրքիայի ֆուտբոլային ընտրանու պայմանագիրը կնքվել է 2010 թվականի փետրվարի 14-ին, սակայն հոլանդացի մասնագետը պաշտոնապես Թուրքիայի ընտրանու գլխավոր մարզչի պաշտոնն ստանձնել է օգոստոսի 1-ին:
