§Ժառանգություն¦ խմբակցության պատգամավորները առաջին իսկ օրվանից օրենսդրական նախաձեռնություններով, հայտարարություններով, կառավարությանը հղած հարցերով, ինչպես և անմիջականորեն շարունակ զորակցել են մեր բյուրավոր համաքաղաքացիների անհատական, հավաքական և համահասարակական նշանակության խնդիրների լուծմանը։
Այդ նախաձեռնությունների գերակշիռ մեծամասնությունն անգամ չի ընդգրկվել պետական մարմինների, առաջին հերթին խորհրդարանի օրակարգում։
«Ազատության¦ հրապարակի այս բարձր հարթակից, ի տարբերություն սահմանափակ ու հանրությանն անմատչելի, վերանորոգված, բայց այդպես էլ չվերափոխված խորհրդարանի, այսօր մենք հնարավորություն ունենք ուղղակի հնչեցնել հանրության պահանջներն ու օրինավոր ակնկալիքները արտացոլող հայտարարությունները։
Վերջին օրերին ամենահաճախակի հնչող հարցն է. «Ի՞նչ է «Ժառանգության¦ առաջնորդ Րաֆֆի Հովհաննիսյանի ասելիքը «Ծոմ Ազատության¦ բողոքի միջոցով¦։
Պատասխանն ակնհայտ է. թե՛ «Ժառանգության¦ և նրա առաջնորդի, թե՛ ոստիկանության և Ազգային անվտանգության ծառայության աշխատակիցների, որոնք սրտի խորքում հասկանում են բողոքի իմաստը, թե՛ մեզ բացահայտ սատարող քաղաքացիների պահանջը մեկն է՝ մեր հայրենիքի և ժողովրդի` մարդ արարածին վայել կեցությունը։
Այնինչ, ինչպես ընդգծված է «Ժառանգության¦ կոչում, իշխանությունների վարած արտաքին քաղաքականությունը տևապես անտեսում է մեր պետական ինքնիշխանությունն ու ազգային շահը, իսկ ներքին քաղաքականությունը խորացնում է անհավասարությունը, անօրինականությունն ու անարդարությունն ու դրանց հետևանք արտագաղթը։
«Ժառանգությունը¦ մինչև վերջ, հնարավոր բոլոր եղանակներով` Ազգային ժողովի ամբիոնից մինչև հրապարակ, տեր է կանգնելու շարունակվող պայքարին Հանրապետության ամբողջ իշխանության օրինական ու արտահերթ նորովի ձևավորման համար, իշխանություն, որը հիմված կլինի ազգային արժեքների և բարոյականության վրա։
Իշխանության կողմից պարտադրված իրողությունը ստիպում է ընդվզել «Ազատության¦ հրապարակում։ Ինչպես ասված է Մարդու իրավունքների համընդհանուր հռչակագրում՝ իշխանությունները պարտավոր են պահպանել մարդու իրավունքները, որպեսզի ժողովուրդը չըմբոստանա։
Իշխանավորները, ովքեր մինչ օրս չեն ընկալում, թե որն է բողոքի իմաստը, թող գան այստեղ և լսեն։
Ձայն բազմաց՝ ձայն Աստծո։