Սիրելի հայրենակիցներ,
Ներկայումս տեղի են ունենում սոցիալ-տնտեսական եւ քաղաքական էական տեղաշարժեր, որոնք շատ դեպքերում ունենում են մեր երկիրը զարգացման ուղուց հնարավորինս հետ գցելու միտում: Այս ամենի պատճառներն անհրաժեշտ է վեր հանել եւ վերացնել: Իսկ պատճառների հիմքը միանշանակ կառավարման համակարգն է, որի ձեւավորման մեջ էական ազդեցություն ունեն ընտրական գործընթացները:
Ազգային ժողովում երեկ սկսվել են Ընտրական օրենսգրքին նվիրված քննարկումները: Արդեն նախնական փուլում խախտվել են բոլոր այն պահանջները, որոնք ներկայացվում են նման կարեւորագույն օրենսգրքի հանդեպ: Դա հասարակական կարծիքի ներառումն է եւ այդ գործընթացին ընդդիմությանը մասնակից դարձնելը, որը ոչ միայն Եվրոխորհրդի տարբեր բանաձեւերի պահանջ է, այլ նաեւ նոր Ընտրական օրենսգրքի լիգիտիմությունը ապահովելու միակ մեխանիզմ: Ցավոք սրտի պետք է նշեմ, որ իշխանությունները նորից որդեգրել են կեղծիքների միջոցով վերարտադրվելու իրենց նախկին սովորույթը եւ անցել այն կյանքի կոչելուն ուղղված քայլերի իրականացմանը: Պատահական չէր այդ առումով Ա1+-ի եթեր չվերադառնալը, նախնական մարդահամարի տվյալները, ըստ որոնց մարզերում բնակչությունը իբրեւ թե աճում է, ինչը նշանակում է ընտրացուցակներում ընդգրկվածների աճ: Մինչդեռ §Ժառանգությունն¦ արդեն որերրորդ անգամ առաջարկում եւ պահանջում է ընտրությանը մասնակցած քաղաքացիների ցուցակների հրապարակում, ինչը հնարավորություն կտա բացահայտել, թե քանի հարյուր հազար գոյություն չունեցող ընտրողներ են ընտրել իշխանություններին: Սա անշուշտ քաղաքացիների գաղտնի քվեարկության կանոնի խախտում չէ, բայց ոչ երբեք մասնակցության փաստ: Ցուցակների այսպիսի հրապարակայնացում թույլատրվում է ժողովրդավարության շատ բարձր մակարդակ ունեցող այնպիսի երկրներում, ինչպիսին են ԱՄՆ-ը եւ Մեծ Բրիտանիան: §Ժառանգության¦ կողմից մշակված Ընտրական օրենսգրքի նախագծի մեջ մեկ այլ մշակված դրույթ վերաբերում է 100-տոկոսանոց համամասնական ցուցակով ընտրությունների անցկացմանը: Դրանով նախ կուսակցությունների կշիռն է ավելանալու, ինչն իր հերթին բերելու է քաղաքական համակարգի զարգացում եւ հնարավորություն է տալու մեծ առաջխաղացում ապահովել կառավարման համակարգում: Մյուս կողմից կեղծիքներ անելու շահագրգռվածությունը էականապես կնվազի: Սակայն սրան եւս իշխանությունները դեմ են: Շատ ենք կարեւորում նաեւ §Ժառանգության¦ կողմից առաջարկվող ԿԸՀ կազմում գործող վերստուգիչ-վերահսկիչ հանձնաժողովի իրական լծակներով օժտումը, ինչը հնարավորություն կտա բացահայտել ֆինանսական խախտումները եւ չարաշահումները:
Հաշվի առնելով, որ իշխանությունների ցանկությունը կայանում է նրանում, որ կեղծիքները չկանխող Ընտրական օրենսգրքի օգնությամբ հերթական ընտրությունների ժամանակ նորից վերարտադրվեն եւ այսպես կառավարեն եւս 7 տարի` հասարակությունը պետք է իրական ընդիմության հետ միասին պայքարի իշխանությունների հրաժարականի եւ արտահերթ ընտրությունների համար: Սա §Ժառանգության¦ եւ Րաֆֆի Հովհաննիսյանի հավատամքն է: Սա պետք է լինի յուրաքանչյուր քաղաքացու պահանջը: