Մեծ Բրիտանիան և Ֆրանսիան կարծիք են հայտնել, որ անհրաժեշտ է Լիբիայում ռազմական գործողությունների կառավարումը հանձնել ՆԱՏՕ-ին: Նախօրեին այս հարցը քննարկել են նաև ԱՄՆ նախագահ Բարաք Օբաման, Ֆրանսիայի նախագահ Նիկոլա Սարկոզին և մեծ Բրիտանիայի վարչապետ Դևիդ Քեմերոնը: Այս մասին հայտնել է Օբամայի ազգային անվտանգության հարցերով խորհրդականի տեղակալ Բեն Ռոդսը, որն ասել է, թե Օբաման զանգել է եվրոպացի առաջնորդներին, ևքննարկել են նաև վերջին օրերի ռազմական գործողությունների հաջողությունները և առաջացած խնդիրները: Այս մասին հաղորդում է RBC-ն:
«Նրանք նաև համաձայնել են, որ ՆԱՏՕ-ն պետք է առանցքային դերակատարություն ունենա գործողությունների կառավարման հարցում»,- նշել է Ռոդսը:
Սակայն ՆԱՏՕ-ի ներգրավումն այս խնդրում բացասաբար է ընդունվել ՆԱՏՕ-ի անդամ չհանդիսացող երկրներում, որոնք մասնակցում են հակաքադաֆիական կոալիցիային: Այդ խնդրից խուսափելու համար Ֆրանսիան առաջարկել է ստեղծել նոր կոմիտե, որը կգտնվի ՆԱՏՕ-ի կազմից դուրս և կմիավորի կոալիցիայի անդամ երկրների արտգործնախարարներին, որոնք միասնական որոշումներ կկայացնեն Լիբիայում հետագա գործողությունների վերաբերյալ: Այս մասին հաղորդում է Эхо Москви-ն:
Միաժամանակ Քաթարի ղեկավարությունը հայտարարել է, որ կոալիցիային իրենց մասնակցությամբ քաթարցիները չեն ցանկացել վնասել ո՛չ Լիբիայի ժողովրդին, ո՛չ էլ Քադաֆիին: Այս մասին ասել է այդ երկրի վարչապետ շեյխ Համադ բեն Ջասեմ Ալ-Թանին: Նա ավելացրել է, որ այդ քայլով Քաթարը ցանկացել է դադարեցնել արյունահեղությունը և բռնությունները խաղաղ բնակչության նկատմամբ: Այս մասին հաղորդում է Al-Jazeera-ն: Նա նաև կարծիք է հայտնել, որ արաբական աշխարհը Քաթարի օրինակով պետք է մասնակցի այս գործողություններին , քանի որ բռնությունները Լիբիական Ջամահիրիայում հասել էին անթույլատրելի մակարդակի: