Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ ավարտվեց կազմակերպված խմբի կողմից կատարված թրաֆիքինգի վերաբերյալ գործի դատական քննությունը:
Ամբաստանյալներ Աղունիկ Այվազյանն ու Ծովիկ Ավետիսյանը արդեն իսկ դատապարտյալներ են նույն գործի այլ՝ արդեն դատաքննված մասով:
Այս մեղադրանքով Աղունիկն ու Ծովիկը, թրաֆիքինգի նպատակով մարդկանց հավաքագրելու, տեղափոխելու, փոխանցելու, թաքցնելու, սեռական՝ պոռնկության շահագործման վիճակի մեջ դնելու և պահելու դիտավորությամբ՝ միավորվել են Արաբական Միացյալ Էմիրություններում բնակվող մի խումբ անձանց հետ, ստեղծել են կազմակերպված հանցավոր խումբ և հանցավոր մտադրություններն իրագործելու նպատակով կատարել են դերաբաշխում:
Կոնկրետ Աղունիկն ու Ծովիկը Հայաստանից հավաքագրել են կանանց , համոզել են, նրանց անձնագրի պատճենն ուղարկել են հանցավոր խմբի ղեկավարին, իսկ վիզան ու տոմսը ստանալուն պես կանանց են ուղարկել Դուբայ՝ յուրաքանչյուր ուղարկված կնոջ համար ստանալով 1000-1500 դոլար:
Թրաֆիքինգով զբաղվող այս կազմակերպված խմբի գործով, ըստ մեղադրողի, արդեն դատապարտվել է 9 հոգի, որոնցից 5-ը կազմակերպված խմբի անդամներ են, իսկ 4-ը աշխատել են խմբ ի կազմում:
4 մարդ, այդ թվում՝ խմբի պարագլուխ Նելլին, հետախուզման մեջ են, նրանց վերաբերյալ գործից մաս է անջատված:
1 հետախուզվող հայտնաբերվել է:
Այս գործով դատապարտվել են նաև Ծովիկ Ավետիսյանի 2 որդիները, իսկ դուստրը որպես շարքային մարմնավաճառ նույնպես ուղարկվել է Դուբայ՝ Նելլիի մոտ…
Աղունիկ Այվազյանի և Ծովիկ Ավետիսյանի ներկա գործը մեկ հատոր է կազմում:
Ծովիկ Այվազյանը հայտնաբերվել է 2010 թվականի հուլիսի 1-ին, իսկ Աղունիկ Այվազյանը՝ 2010 թվականի հուլիսի 14-ին:
Մայրաքաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը նրանց նախկին գործով դատավճիռ է կայացրել 2013 թվականի մայիսի 2-ին:
2013 թվականի մարտին Աղունիկ Այվազյանը հանդես է եկել մեղայականով՝ խոստովանելով նոր արարքներ, որոնք տեղ են գտել այս նոր քրեական գործում:
Նախորդ դատավճռով թրաֆիքինգի համար մեղավոր ճանաչված Աղունիկ Այվազյանը վերջին հաշվով դատապարտվել է 11 տարի 7 ամիս, իսկ Ծովիկ Ավետիսյանը՝ 10 տարի 6 ամիս ազատազրկման:
Նախօրեին մեղադրական ճառով հանդես եկավ մեղադրող դատախազ Ա. Մարուխյանը:
Նա ընդգծեց թրաֆիքինգի հասարակական մեծ վտանգավորությունը և այդ հանցատեսակի դեմ պայքարի ամենայն լրջությունը ամբողջ աշխարհում:
Դատախազը նշեց, որ Աղունիկ Այվազյանը և Ծովիկ Ավետիսյանը կատարել են իրենց մեղսագրված արարքը՝ ՀՀ քրեական օրենսգրքի 132 հոդվածի 3-րդ մասի 1-ին մասով:
Որպես Աղունիկ Այվազյանի պատասխանատվությունն ու պատիժը մեղմացնող հանգամանք՝ մեղադրողն առանձնացրեց նրա կողմից մեղայականով հանդես գալը:
Ծովիկ Ավետիսյանի պարագայում մեղմացուցիչ հանգամանք մեղադրողն ի հայտ չէր բերել:
Մեղադրողը միջնորդեց Աղունիկ Այվազյանին մեղավոր ճանաչել, դատապարտել 10 տարի ազատազրկման, այս պատիժը մասնակիորեն գումարել նախորդ դատավճռով սահմանված պատժին ու վերջնական պատիժ նշանակել 12 տարի ազատազրկումը:
Ծովիկ Ավետիսյանին մեղավոր ճանաչել ու դատապարտել 10 տարի ազատազրկման, այս պատիժը մասնակիորեն գումարել նախորդ դատավճռով նշանակված պատժին ու վերջնական պատիժ նշանակել 11 տարի ազատազրկումը:
Աղունիկ Այվազյանն իր պաշտպանական կարճ ճառում ասաց, որ իրեն մեղավոր է ճանաչում, բայց միաժամանակ ցանկանում է ասել, որ ինքը ենթարկվել է շանտաժների՝ մինչև կարողացել է իր իրավունքները պաշտպանել: «Ես չէի պատկերացնում, որ այսպիսի պատժի կդատապարտվեմ»:
Ծովիկ Ավետիսյանը չօգտվեց ճառի իրավունքից:
Ամբաստանյալները խնդրեցին, որ դատարանը մեղմ վարվի իրենց նկատմամբ:
Կենտրոն և Նորք-Մարաշ վարչական շրջանների ընդհանուր իրավասության դատարանը Աղունիկ Այվազյանին ու Ծովիկ Ավետիսյանին մեղավոր ճանաչեց մեղսագրված արարքի՝ թրաֆիքինգով զբաղվող կազմակերպված խմբի կազմում տուժողների հավաքագրման համար:
Աղունիկ Այվազյանը դատապարտվեց 11 տարի ազատազրկման: Այս պատիժը մասնակիորեն գումարվեց նախորդ դատավճռով նշանակված պատժին, ու վերջնական պատիժ նշանակվեց 12 տարի ազատազրկումը:
Ծովիկ Ավետիսյանը դատապարտվեց 10 տարի ազատազրկման: Այս պատիժը մասնակիորեն գումարվեց նախորդ դատավճռով նշանակված պատժին, ու վերջնական պատիժ սահմանվեց 11 տարի ազատազրկումը:
