ԼՂՀ վարչապետ Արա Հարությունյանի մոտ այսօր հրավիրված խորհրդակցությունը նվիրված էր հանրապետության տարածքում ջրամատակարարման բարելավմանը: Խորհրդակցությանը, որին ներկա էին շրջվարչակազմերի ղեկավարներն ու շահագրգիռ օղակների պատասխանատուներ, ներկայացվեց ջրամատակարարման ոլորտում տիրող իրավիճակը: Այն գնահատվեց անբավարար և, պայմանականորեն, բաժանվեց երեք խմբի. կանոնավոր ջրամատակարարում, կենտրոնացված, սակայն հին համակարգի առկայություն և հիմնականում համայնքներին բնորոշ անկանոն ջրաբաշխում: Կմշակվի նոր ռազմավարություն, որով կառաջնորդվեն բնակչությանը նորմալ ջրամատակարարում ապահովելու համար: Նախքան քննարկման փուլում գտվող Ջրի ազգային ծրագրի հաստատումը, պետք է հստակեցվեն կարևորագույն մի շարք հարցեր: Հնչեցին առաջարկություններ` օրինակներ բերելով ՀՀ օրենսդրական դաշտից, փորձից և շեշտելով տեղի առանձնահատկությունները:
Պայմանավորվածություն ձեռք բերվեց ջրային համակարգի գործունեությունը միասնական ձևով վարելու մասին, չնայած շատ համայնքներ դեմ են դրան: Այն կլինի պետական վերահսկողության ներքո: Հետագայում, մի շարք հարցերի լուծումից հետո, արդյունավետության ապահովման համար կառավարումը հնարավոր է վստահվի նաև մասնավոր հատվածին:
Խորհրդակցությանը քննարկվեց նաև ներքին ջրացանցերի անմխիթար վիճակը: «Ջրամատակարարում-ջրահեռացում» ՓԲԸ կողմից աշխատանքներ են իրականացվում ներքին ցանցերի բարելավման ուղղությամբ: Ռազմավարական նշանակության այս ոլորտը, որը երկար տարիներ գտնվում էր բարձիթողի վիճակում, մեծ ծավալի ներդրումներ և երկար տարիների աշխատանք է պահանջում:
Քննարկվեցին ոլորտին առնչվող այլ հարցեր ևս. մասնավորապես, անդրադարձ եղավ Ասկերանի շրջանի ներքին նոր ջրացանցի շահագործմանը խոչընդոտող և Հադրութի համայնքներից մեկում ջրաբաշխման խափանումը վերացնելու խնդիրներին:
Խորհրդակցությանը ներկա էին փոխվարչապետ, ֆինանսների նախարար Սպարտակ Թևոսյանը, ԿԱ արտադրական ենթակառուցվածքների վարչության պետ Կառլեն Պետրոսյանը:
ԼՂՀ կառավարություն