ԼՂՀ կառավարությունը հաստատել է հանրապետության պետական բարձրագույն ուսումնական հաստատությունների 2011-2012 թթ. ուսումնական տարվա` ըստ մասնագիտությունների պետության կողմից ուսանողական նպաստների ձևով ուսման վարձի լրիվ փոխհատուցմամբ (անվճար) և վարձի մասնակի զեղչի կիրառման իրավունքով (վճարովի) բակալավրիատի առկա և հեռակա ուսուցմամբ վճարովի տեղերը:
Դրանց ընդհանուր թիվը կազմում է` անվճար` 110, վճարովի` 975 տեղ: Գալիք ուսումնական տարում ԼՂՀ կառավարությունը ՀՀ բուհերում կապահովի արցախցի 60 ուսանողի անվճար ուսուցումը: Իսկ ԱրՊՀ ասպիրանտուրայում ուսուցման անվճար տեղերի թիվ է սահմանվել 25, վճարովին` 50: Արցախի պետական բուհերում ուսման վարձի լրիվ կամ մասնակի զեղչի կիրառում կիրականացվի նաև մագիստրոսական կրթական ծրագրով:
Այդ հաստատությունների ուսանողների համար սահմանվել են կրթաթոշակներ հետևյալ չափերով` սովորական` 5000 դրամ, ավարտական կուրս` 5200 դրամ, «գերազանց» գնահատականներ ունեցող ուսանողների կրթաթոշակ` 8000 դրամ, մագիստրանտների սովորական կրթաթոշակ` 6,500 դրամ, գերազանցիկ մագիստրանտների համար` 8,500 դրամ: Նիստում կրթական բովանդկության վերջին որոշմամբ` հաստատվել է ոչ պետական բուհերի նախորդ տարիների շրջանավարտներին պետական նմուշի դիպլոմ հանձնելու համար ամփոփիչ ատեստավորման քննությունների կազմակերպման կարգը:
Ընթացքը կարգավորվում է ԼՂՀ կրթության և գիտության նախարարի ստեղծած հանձնաժողովի կողմից:
ԼՂՀ կառավարություն
