Իրանի նախագահ Մահմուդ Ահմադինեժադն այսօր քննադատության է ենթարկել Ռուսաստանի դիրքրոշումը С-300 համակարգերի վաճառքից հրաժարվելու կապակցությամբ:
«Նրանք վաճառեցին Իրանը մեր թշնամիներին, միակողմանի չեղյալ հայտարարեցին պայմանագիրը, որի համար մենք վճարել էինք»,-Իրանի նախագահի խոսքերը մեջբերում է ռուսական Rosbalt գործակալությունը: «Այս մարդիկ, որոնք գործում են սատանայի ազդեցության տակ, կարծում են, որ եթե հրաժարվում են պաշտպանողական պայմանագրից, ապա մեզ դրանով վնաս են հասցնում», -հայտարարել է Ահմադինեժադը:
Հիշեցնենք, որ մի քանի տարի առաջ Ռուսաստանը պայմանագիր էր ստորագրել Իրանի հետ` С-300 համակարգեր տրամադրելու վերաբերյալ: Սակայն Իրանի դեմ ընդունված պատժամիջոցների պատճառով Ռուսաստանը հրաժարվեց այդ համակարգերը իրանական կողմին տրամադրելուց, ինչի հետևանքով խիստ լարվեցին իրանա-ռուսական հարաբերությունները:
