ԵԱՀԿ Մինսկի խումբը այսօր Վիեննայում կներկայացնի դաշտային գնահատման խմբի կողմից 2010 թ. հոկտեմբերի 7-13-ը ԼՂՀ հարակից 7 շրջաններում անցկացված դիտարկումների արդյունքները: Այս մասին հաղորդում է РИА Новости գործակալությունը` վկայակոչելով ԵԱՀԿ պաշտոնական կայքը:
Հավաքված տեղեկատվությունը մշակելուց հետո համանախագահները փորձագետների հետ միասին անցած տարի պատրաստվում էին ԵԱՀԿ ներքին զեկույց ներկայացնել, որը կտարածվեր անդամ բոլոր երկրներում, սակայն զեկույցի հրապարակումը քանիցս հետաձգվում էր:
Այս տարվա մարտի 15-17-ը տարածաշրջան այցի ընթացքում միջազգային միջնորդները արդեն Հայաստանի 7 Ադրբեջանի նախագահներին ներկայացրել են ԵԱՀԿ դաշտային գնահատման խմբի զեկույցը: Սակայն դա արվել է ներքին կարգով, և հասարակությունն այդ մասին չի իրազեկվել: Միջնորդները նշել են, որ առաքելությունը ԵԱՀԿ Մինսկի խմբի համանախագահներին օգնել է հանդիպել տեղաբնակների հետ, ինչպես նաև ծանոթանալ այդ տարածքներում իրավիճակին`բոլոր առումներով, այդ թվում՝ մարդասիրական:
«Փախստականների հարցով ՄԱԿ-ի գերագույն կոմիսարիատի տեխնիկական փորձագետների աննախադեպ ակտիվ մասնակցությունը առաքելության խմբին հնարավորություն ընձեռեց ավելի լավ հասկանալ տարածաշրջանի փախստականների և տեղահանված անձանց իրավունքները, ինչպես նաև այն խնդիրները, որոնց դիմակայում են այդ մարդիկ»,- նշված է առաքելության հայտարարության մեջ: