Վրացական apsny.ge լրատվական կայքի փոխանցմամբ, Թուրքիան համաձայնել է Լիբիայում ներկայացնել ԱՄՆ-ի շահերը: Այս մասին հայտարարել է ԱՄՆ պետդեպարտամենտի ներկայացուցիչ Մարկ Տոները.
«Մենք շատ շնորհակալ ենք Թուրքիային, որ նա համաձայնեց խաղալ այդ դերը, ինչպես նաև «Նյու Յորք Թայմսի» 4 լրագրողների` Լիբիայից անվտանգ տարհանման հարցում նրա գործադրած ջանքերի համար: Լիբիական իշխանություններից ազատված մեր լրագրողներին նախ հանձնել են Տրիպոլիում գտնվող թուրք դիվանագետներին, որից հետո նրանք մեկնել են Թունիս»:
Հիշեցնենք, որ Թուրքիայի վարչապետ Էրդողանի և ԱՄՆ նախագահ Բարաք Օբամայի միջև կայացած հեռախոսազրույցում կողմերը պայմանավորվել են լիովին պահպանել Լիբիայի ժողովրդի պաշտպանության շուրջ ՄԱԿ ԱԽ բանաձևերի իրագործումը և նրան հնարավորություն ընձեռել, ժողովրդական կամքը հարգող դեմոկրատական համակարգի ստեղծմամբ, վերափոխել սեփական երկիրը: