«Առաջին լրատվական»-ի զրուցակիցն է ԱԺ «Հանրապետական» խմբակցության ղեկավար Վահրամ Բաղդասարյանը:
– Պարոն Բաղդասարյան, լրացավ վարչապետ Հովիկ Աբրահամյանի պաշտոնավարման 100 օրը, Ձեր կարծիքով` այս ընթացքում նրան ի՞նչ է հաջողվել անել:
– Բնականաբար, 100 օրում հնարավոր չէր իրականացնել կառավարության ներկայացրած բոլոր ծրագրերը, բայց որ աշխատանք կատարվում է, որևէ մեկը չի կարող բացառել: Եվ ինձ թվում է, որ մինչև տարվա վերջ արդյունքներն արդեն տեսանելի կլինեն: Եթե դա տեսանելի լիներ մեկ ամսվա կամ 100 օրվա ընթացքում, դա կարող էր բավականին ծանր անդրադառնալ փոքր ու միջին բիզնեսի վրա, որովհետև դա կլիներ տապոռային քաղաքականություն: Ամեն ինչ պետք է հավասարակշռված արվի, որ վնաս չտրվի տնտեսվարողներին: Տնտեսությունը շատ զգայուն է, և միանգամից ռեֆորմներ կատարելը ու խաղի կանոններ փոխելը շատ ծանր հետևանքներ կթողնի: Եվ ինձ թվում է, որ կառավարության բարեխիղճ աշխատանքի դեպքում արդյունքը կտեսնենք:
– Հ. Աբրահամյանը հայտարարել էր գործարար միջավայրում հավասար խաղի կանոններ ստեղծելու մասին, և որ այդ կանոնները վերաբերելու են նաև իրեն ու իր մերձավորներին: Սակայն ստուգվող կամ խախտում կատարող ընկերությունների ցանկում նրան պատկանող ընկերություն չկա, իսկ վարչապետի փեսաները ստանում են հարկային պետի պաշտոններ:
– Ես չգիտեմ, թե որոնք են վարչապետի կամ մյուսների տնտեսությունները, բայց եթե դուք ունեք տեղեկատվություն` ասեք: Եվ չեմ կարծում, որ նման տիպի բան լինի: Եթե հավասար է, ուրեմն բոլորի համար պետք է հավասար դաշտ լինի: Անուններ տանք, թե սա վարչապետինն է, սա մյուսինն է, ես չեմ տիրապետում նման տեղեկության: Եվ ես վերլուծություններ չեմ արել կամ տեղեկատվություն չունեմ, թե նրա մերձավորներն ովքեր են և որտեղ են նշանակվում, բայց եթե այդպես լինի, պետք է գնահատել, թե տվյալ անձնավորությունը ունա՞կ է այդ պոստում աշխատելու համար: Իսկ ի՞նչ է` որևէ պաշտոնյայի բարեկամ անաշխատա՞նք պետք է մնա: Այլ բան է, որ եթե մասնագետներ չեն կամ ունեն աշխատանքային թերացումներ, կարելի է արդեն քննադատաբար մոտենալ, որ մարդիկ իրենց տեղում չեն: Իսկ եթե արդյունքը դրական լինի, հակառակը` պետք է գովեստի խոսքեր ասենք:
– Բայց կան շատ ավելի գրագետ մասնագետներ, ովքեր աշխատանք չունենալու պատճառով արտագաղթում են, իսկ պաշտոնյաների բարեկամներն ու որդիները նշանակվում են բարձր պաշտոնների:
– Ես պաշտոնյա եմ, կարո՞ղ եք իմ բարեկամներից մեկին նշել, որ պաշտոն է զբաղեցնում: Դուք մի բան եք ասում, որի մասին ես տեղեկություն չունեմ, ես անձերով չեմ հետաքրքրվում, արդյունքներն եմ նայում:
– Իսկ այս 100 օրերի ընթացքում նոր վարչապետն ու կառավարությունն ինչ փոփոխություններ են արել:
– Ինձ թվում է, որ բոլոր ոլորտների նկատմամբ հետևողականությունն է մեծացել, պարբերաբար խորհրդակցություններ, զեկուցումներ կան: Բայց փոփոխությունների արդյունքները մենք ոչ թե 100 օրերի ընթացքում պետք է ամփոփենք, այլ կարելի է որոշ ժամանակ էլ համբերել: Տարին փակելուց հետո, բյուջեի հաշվետվության ժամանակ կարելի է արդյունքները ամփոփել:
– Իսկ ՀՀԿ-ի գործադիր մարմնի նիստերին քննարկվո՞ւմ են հարցերը, թե ինչպես է աշխատում ձեր նոր վարչապետը, նրան հաջողվո՞ւմ է կրճատել ստվերային տնտեսությունը կամ վերականգնել կառավարության նկատմամբ հասարակության վստահությունը:
– ԳՄ նիստերին ցանկացած հարց՝ թե՛ ներքաղաքական, թե՛ արտաքին քաղաքական քննարկվում է:
– Ս. Սարգսյանը գնահատե՞լ է վարչապետի 100 օրվա աշխատանքը, անցած հինգշաբթի ԳՄ նիստ եք ունեցել:
– Նախագահը կտա իր գնահատականը: Այս հինգշաբթի էլ ենք նիստ ունենալու:
– Հնարավո՞ր է այս նիստի ժամանակ տա իր գնահատականը:
– Ինձ թվում է, որ որոշ խոսակցություն կլինի, իհարկե:
– Այս ընթացքում կարծես թե հրապարակային դաշտից դուրս է եկել Սերժ Սարգսյանը՝ տեղը զիջելով Հ. Աբրահամյանին: Դա նպատակայի՞ն քայլ է՝ Հ. Աբրահամյանի համար փորձաշրջա՞ն, թե՞ Ս. Սարգսյանը որոշել է առայժմ հրապարակային դաշտում չերևալ:
– Նախագահն իր դիրքերը որևէ անգամ չի զիջում: Ի՞նչ է` ձեզ թվում է, թե անընդհատ էկրաններին երևալով կամ ելույթ ունենալո՞վ պետք է ցույց տա աշխատանքը:
– Նախկինում նա հանդիպում էր վարչապետի ու կառավարության անդամների հետ, խորհրդակցություններ ու կարգադրություններ էր անում, անվտանգության խորհրդի նիստ հրավիրում: Հիմա կարծես թե ընդհատակ է անցել:
– Ո՛չ, այդպես չէ, բավականին հետևողականորեն հետևում է թե օրենսդիր, թե գործադիր մարմինների աշխատանքներին: Հետևողականորեն հանդիպումներ է ունենում և հանձնարարականներ տալիս մեր գործընկերներին: Եվ այսօր ինձ թվում է, որ նախագահն իր ուշադրությունն ավելի շատ սևեռել է արտաքին քաղաքականության վրա` հայտնի պատճառներով, որովհետև մենք բավականին լուրջ խնդիրներ ունենք: Իսկ երբ նա ներքին քաղաքականությանը չի միջամտում, դա նշանակում է, որ ունի վստահություն:
– Բայց արտաքին քաղաքականությունից նույնպես Հ. Աբրահամյանն է շատ խոսում, հանդիպում է ՌԴ վարչապետ Դմիտրի Մեդվեդևի հետ, Եվրասիական տնտեսական միությանը Հայաստանի անդամակցությունից է խոսում և այլն:
– Բնականաբար, դա ձևաչափ է: Հանդիպեցին ՀՀ և ՌԴ արտաքին գործերի նախարարները, վարչապետները հանդիպեցին Սոչիում, խորհրդարանների ղեկավարները՝ Մոսկվայում: Այս հանդիպումներից հետո արդեն ամփոփիչ հանդիպում կլինի նախագահների մակարդակով: Դա շատ նորմալ գործընթաց է, որն իր բնականոն հունով գնում է: Ես արդեն մի քանի անգամ ասել եմ, որ ամռան ընթացքում ՀՀ-ի և ՌԴ-ի նախագահների հանդիպումը տեղի կունենա, և բավականին հուզող հարցերին պատասխան կտրվեն:
– Այսինքն` Վլադիմիր Պուտինի հետ հանդիպումից հետո նո՞ր Ս. Սարգսյանը կխոսի:
– Բնականաբար, երբ որ ամփոփված կլինեն պայմանագրային դրույթները, պարբերաբար տեղեկատվություն կտրվի: Շտապելու կարիք չկա, շտապողականությունը կարող է խանգարել: Մինչև հունվար ժամանակ ունենք:
