«100 օրվա ժամանակը, որ այդպես սինվոլիկ ընտրված է, իրականում բավարար չէ, որ կոնկրետ գնահատականներ տաս կառավարության գործունեությանը: Հատկապես տնտեսական հարցերի համար կես տարին նույնիսկ բավարար չէ: Բայց այսօրվա արդյունքներով երբ նայում ենք՝ էական փոփոխություններ չենք նկատում։ Հակառակը՝ պաշտոնական վիճակագրության համաձայն, նույնիսկ կան ուղղություններ, որոնցում հետընթաց է արձանագրվել»,- «Առաջին լրատվական»-ի հետ զրույցում անդրադառնալով վարչապետ Հովիկ Աբրահամյանի կառավարության 100 օրվան՝ նման կարծիք հայտնեց «168 ժամ»-ի տնտեսական մեկնաբան Բաբկեն Թունյանը:
Հարցին, թե կապահովի՞ արդյոք Աբրահամյանի կառավարությունը խոստացված 4 տոկոս տնտեսական աճը, Բաբկեն Թունյանը պատասխանեց․ «Ինձ թվում է՝ հնարավոր է տարվա վերջում ապահովել, եթե ոչ՝ ապա մեր վիճակագրական ծառայությունները ճշգրտումներ կանեն ու կգրեն այն թիվը, որը պետք է»:
Հետաքրքվեցինք նաև, թե, հաշվի առնելով նոր կառավարության նախարարների նախկինում ծավալած գործունեությունը, դրական ակնկալիքներ կարո՞ղ ենք ունենալ․ «Անձամբ ես ինչ-որ դրական ակնկալիքներ չունեմ, որովհետև ստացվում է, որ ՀՀԿ որոշ մոտեցումներ հակասում են իրար: Նախորդ տարիների տնտեսական քաղաքականությունը քննադատվում էր, ասում էին՝ շինարարական փուչիկ է փչվում, բայց էկոնոմիկայի նախարար է նշանակվում Կարեն Ճշմարիտյանը, ով այդ տարիներին այդ փուչիկ փչողներից մեկն էր»:
Մեր զրուցակցին խնդրեցինք համեմատել նաև նախկին վարչապետ Տիգրան Սարգսյանի և Հովիկ Աբրահամյանի գործունեությունը․ «Հովիկ Աբրահամյանի և Տիգրան Սարգսյանի միջև երկու տարբերություն կա: Տիգրան Սարգսյանն ավելի շատ մտավորական տեսակի մեջ էր, գուցե չափից ավելի, իսկ Հովիկ Աբրահամյանն ավելի պրակտիկ մարդ է, շատերից եմ լսել, նույնիսկ գործարարներից: Բայց ընդհանուր քաղաքականությունը երկու վարչապետերի մեծ փոփոխության չի կարող ենթարկվել՝ Հ․ Աբրահամյանի նշանակման ժամանակ հանրապետության նախագահն ասաց, որ Հովիկ Աբրահամյանը պետք է Տիգրան Սարգսյանի օրոք սկիզբ առած բարեփոխումները շարունակի: Օրինակ՝ կուտակային համակարգը մնաց, մենք տեսնում ենք՝ շարունակվում է, պետությունն այդ գաղափարից չհրաժարվեց, ձգտելու են ամբողջ ժողովրդի վրա տարածել»:
Բաբկեն Թունյանն առանձնացրեց նաև կառավարության հանդեպ հասարակության վստահության խնդիրն ու ասաց, որ առայժմ հակառակն է տեղի ունենում․ «Նույն կուտակայինի հարցը չլուծվեց այնպես, ինչպես մարդիկ ակնկալում էին, երկրորդ՝ էլեկտրաէներգիայի թանկացումը, որն, իմ կարծիքով, հիմնավորված չէր»:
Հարցազրույցն ամբողջությամբ՝ մեր տեսանյութում։