Շիրակի մարզի ընդհանուր իրավասության դատարանում Մարտին Սարոյանի նախագահությամբ ավարտվել է Արմեն Տիգրանյանի գործի դատական քննությունը:
34-ամյա գյումրեցի Արմեն Տիգրանյանը ամուսնացած է, երկու երեխա ունի:
Նա մեղադրվում է իր հորն ու մորը ծեծի ենթարկելու, հոր առողջությանը թեթև վնաս պատճառելու համար՝ ՀՀ քրեական օրենսգրքի 118 և 117 հոդվածներով՝ երկուական դրվագներով:
Ըստ մեղադրանքի՝ 2014 թվականի փետրվարի 24-ին, ժամը 19-ն անց 30-ի սահմաններում Արմեն Տիգրանյանը կենցաղային վեճի ժամանակ ոտքերով ու ձեռքերով հարվածներ է հասցրել հորը՝ պատճառելով առողջության թեթև վնաս՝ առողջության կարճատև քայքայումով:
Վեճին միջամտել է Արմենի մայրը, բայց որդին մորը նույնպես հարվածներ է հասցրել:
Նույն տրամադրվածությամբ է ծնողների հետ վիճել Արմենը նաև մարտի 31-ին, ժամը 23-ի սահմաններում:
Նա դարձյալ ոտքերով ու ձեռքերով հարվածներ է հասցրել ծնողներին՝ հոր առողջությանը նորից պատճառելով թեթև վնաս՝ առողջության կարճատև քայքայումով:
Ընդհանուր իրավասության դատարանում Արմեն Տիգրանյանն իրեն մեղավոր չի ճանաչել:
Նա հայտնել է, թե 2013 թվականի դեկտեմբերին իր կինն ու երեխաները հեռացել են իր տնից:
Ինքը «օրինական կարգով» ցանկացել է նրանց վերադարձնել, բայց դրա համար գումար է անհրաժեշտ եղել:
Ցանկացել է վաճառել իրենց տան հարակից գոմը, բայց ծնողները դեմ են եղել, ինչի պատճառով իրենց միջև հաճախ լեզվակռիվներ են եղել: Բայց ինքը ծնողներին չի ծեծել, նրանց հետ լավ հարաբերությունների մեջ է:
2014 թվականի փետրվարի 24-ին հայրը տաքսիով խմած տուն է եկել: Ինքը նրա վիճակը տեսնելով՝ ցանկացել է տանել ու պառկեցնել անկողնում:
Երբ հայրը հասել է անկողնուն, հանկարծ պատահաբար սայթաքել է ու դեմքը հարվածել մահճակալի մոտ գտնվող փոքրիկ պահարանին: Ահա թե ինչու է նա աչքի շրջանում վնասվածք ստացել:
Հետո նա պառկել է ու քնել: Այդ օրն ինքը ծնողների հետ չի վիճել, նրանց ընդհանրապես չի հարվածել: Թե որտեղից են առաջացել նրանց վնասվածքները՝ ոչ մի տեղեկություն չունի:
2014 թվականի մարտի 31-ին, ժամը 23-ի սահմաններում ինքը տուն է եկել: Մայրը եղել է հյուրասենյակում, հայրը՝ ննջարանում:
Ինքը մորն ասել է, որ ուզում է երեխաներին հետ բերել, դրա համար անհրաժեշտ գումար ձեռք բերելու նպատակով ցանկանում է վաճառել գոմը:
Այդ պահին հայրը, լսելով իրենց խոսակցությունը, դուրս է եկել ննջարանից, հայհոյել իր ընտանիքի հասցեին: Ինքը կատաղել է, հարձակվել հոր վրա: Քաշքշել են իրար: Ինքը բռունցքով հարվածել է հոր կրծքավանդակին: Հայրը հետ-հետ է գնացել, վայր է ընկել ու, վեր կենալով, մոր հետ հեռացել է տնից:
Այդ օրն ինքն ընդամենը մեկ անգամ հարվածել է Մելսիկի՝ հոր կրծքավանդակին: Մորն ընդհանրապես չի խփել: Նրանց վրա առկա վնասվածքներից տեղեկություններ չունի:
Տուժող Մելսիկ Տիգրանյանը հայտնել է, որ որդու վարքագծի պատճառով նրանից հեռացել են կինն ու երեխաները: Որդին մշտապես իրենց՝ ծնողներին է մեղադրել նրանց հեռացման համար, անհիմն վեճեր է սարքել ու ծեծել իրենց:
Որոշ դեպքերում իրենք չեն դիմել ոստիկանություն: Երեք դեպքերում էլ դիմել են: Հետո առաջին դեպքով նորից հաշտվել են, չեն ցանկացել, որ Արմենը պատժվի, բայց մյուս երկու դեպքում արդեն չեն հաշտվել ու ցանկացել են, որ Արմենը քրեական պատասխանատվության ենթարկվի:
Վերջին վիճաբանությունների ժամանակ նույնիսկ Արմենից վախենալով՝ մի քանի անգամ հեռացել են տնից, ապաստանել ծանոթների տանը:
Տուժողն ասել է, թե տվյալ պահին էլ ինքն ու կինը ապրում են ծանոթի տանը:
Ըստ ամբաստանյալի հոր՝ փետրվարի 24-ին ինքը տաքսիով շուկայից եկել է տուն: Բակում հանդիպել է որդուն, նա եղել է ալկոհոլի ազդեցության տակ:
Որդին վիճաբանելու պատրվակով նախ հարցրել է, թե ինչու է հայրը տաքսիով շրջում: Հետո պահանջել է տուն վերադարձնել կնոջն ու երեխաներին:
Ինքը սկզբում չի արձագանքել: Բայց Արմենը մի քանի անգամ կրկնել է նույն բանը: Ինքը ջղայնացել է, հայհոյել Արմենի ու նրա ընտանիքի հասցեին:
Արմենը կատաղել է ու բռունցքով հարվածել է իր ձախ աչքին, ոտքով էլ խփել է իր ոտքին:
Այդ պահին կինը՝ Տատյանան, տանից բակ է դուրս եկել: Ինքը կնոջ հետ տուն է մտել:
Քիչ անց ննջարան է մտել Արմենը, պառկած տեղում սկսել է ծեծել իրեն ոտքերով ու ձեռքերով:
Կինը ցանկացել է միջամտել: Արմենը նրան էլ է հարվածել, հետո հանդարտվել ու հեռացել է:
Իրենք չեն կարողացել Արմենին դիմադրել, ոչ էլ՝ հարվածել նրան: Իսկ որդու հարվածներից իրենք վնասվածքներ են ստացել:
Մարտի 31-ին, ըստ տուժողի, ինքը կնոջ հետ պառկած է եղել ննջարանում: Հանկարծ ներս է մտել Արմենը, մորից օղի է պահանջել: Մայրն ասել է, թե օղի չի տեսել:
Արմենը հարձակվել է մոր վրա, ոտքերով ու ձեռքերով հարվածներ է հասցրել: Ինքը փորձել է անկողնուց վեր կենալ, միջամտել, բայց չի հասցրել: Արմենը մորը թողել ու հարձակվել է իր վրա, բռունցքներով հարվածներ է հասցրել:
Բռունցքի մի հարված է հասցրել իր կրծքին, ինքն ընկել է: Մի կերպ պրծնելով Արմենի ձեռքից՝ իրենք փախել են տնից:
Հայրն ասել է, թե Արմենից պահանջ չունի, բայց չի էլ հաշտվել ու խնդրել է որդուն խիստ պատժել:
Ամբաստանյալի մայր Տատյանան նույն բանն է ասել, ինչ՝ ամուսինը: Նա ևս չի հաշտվել որդու հետ, խնդրել է Արմենին խիստ պատժել:
Ընդհանուր իրավասության դատարանը Արմեն Տիգրանյանին մեղավոր է ճանաչել մեղսագրված հանցանքների կատարման՝ իր հարազատ ծնողներին ծեծի ու բռնությունների ենթարկելու, վնասվածքներ պատճառելու համար:
Արմեն Տիգրանյանը վերջին հաշվով դատապարտվել է 3 ամիս կալանքի:
