Ամերիաբանկի գերծունեության ընթացիկ տարվա առաջին կիսամյակի արդյունքները փաստում են, որ Հայաստանի բանկային համակարգում Ամերիաբանկը ամրապնդում է իր դիրքերն առաջատարների շարքում:
2014 թվականի առաջին կիսամյակում բանկի ակտիվներն աճել են շուրջ 9 տոկոսով և այս տարվա հունիս ամսվա դրությամբ կազմել 343 միլիարդ դրամ: Ավելի քան 10 տոկոսով աճել են նաև բանկի պարտավորությունները՝ կազմելով 303 միլիարդ դրամ: Իսկ հաճախորդների նկատմամբ ունեցած պարտավորություններն աճել են 30 տոկոսով և կազմել 221 միլիարդ դրամ: Եվ սա այն դեպքում, երբ նույն ցուցանիշների գծով ՀՀ բանկային համակարգում ընթացիկ տարվա առաջին կիսամյակում նվազում է գրանցվել:
«Սակայն Ամերիաբանկը 2014 թվականի առաջին կիսամյակի արդյունքներով ակտիվների, պարտավորությունների և հաճախորդների նկատմամբ ունեցած պարտավորությունների մեծությամբ շարունակում է պահպանել առաջատարի դիրքը ՀՀ բանկային համակարգում»,- այսօր լրագրողների հետ հանդիպման ժամանակ ընդգծեց Ամերիաբանկի տնօրինության անդամ, գլխավոր տնօրենի տեղակալ, ֆինանսական տնօրեն Գևորգ Թառումյանը: Նա նշեց, որ միայն վարկային ներդրումների մասով է Ամերիաբանկը զիջում իր դիրքերը՝ բանկային համակարգում զբաղեցնելով երկրորդ տեղը: «Ինչ խոսք, այդ մասով դեռ անելիքներ կան»,-ասաց բանախոսը:
Ինչ վերաբերում է բանկի ստացած շահույթին, ապա այս տարվա հունիս ամսվա դրությամբ բանկի շահույթը կազմել է 2,9 միլիարդ դրամ, որի մասնաբաժինը շուկայում կազմում է 16 տոկոս: «Ամբողջ բանկային համակարգում շահույթի մասով նվազում է նկատվում, իսկ մեզ մոտ 3 տոկոս աճ կա, որը մենք բավականին մեծ ձեռքբերում ենք համարում»,- հավելեց Թառումյանը:
Ամերիաբանկի ֆինանսական տնօրենն ընդգծեց, որ ՓՄՁ-ներին տրված վարկերը հաշվետու եռամսյակում աճել են 15 տոկոսով, և այս տարվա հունիս ամսվա դրությամբ վարկերի պորտֆելը կազմել է ավելի քան 38 միլիարդ դրամ:
Գևորգ Թառումյանն ընդգծեց նաև, որ ընթացիկ տարվա երկրորդ եդամսյակում Ամերիաբանկն արդեն երկրրոդ անգամ արժանացել է Euromoney-2014 գերազանցության մրցանակին՝ որպես տարվա լավագույն բանկ Հայաստանում: Բացի դրանից՝ բանկն արժանացել է Վերակառուցման և զարգացման եվրոպական բանկի «Տարվա գործարք-2013» մրցանակին:
Թառումյանը թվարկեց նաև այն բոլոր ակցիաներն ու արշավները, որոնք ձեռնարկել են այս եռամսյակում, և որոնք բացառապես ուղղված են եղել իրենց հաճախորդների հարմարավետությանը: