Արմավիրի քաղաքապետի թեկնածու Սևակ Մինասյանի վստահված անձ Սարգիս Ցականյանը մեզ հետ զրույցում այսօր պատմեց, որ ընտրությունների օրը Արմավիրում ձերբակալվել է քիք-բոքսինգի միջազգային մրցաշարերի հաղթող, Քիք-բոքսինգի ազգային ֆեդերացիայի անդամ, մարզիչ Անուշավան Ալեքսանյանը։
Վերջինս ականատես է եղել, թե ինչպես է Տիգրան անունով մեկը մարտի 20-ին` Արմավիրում տեղի ունեցած քաղաքապետի ընտրությունների ժամանակ, ոստիկանների աչքի առաջ ընտրակաշառք բաժանում։ Նրան հրավիրել է ընտրական շտաբ հասկանալու համար, թե ինչ է կատարվում, քանի որ ընտրակաշառք բաժանողի մոտ ցուցակներ են եղել և 5 հատ 10-հազարանոց թղթադրամ, ինչից կարելի է ենթադրել, որ Արմավիրում 1 ձայնը 10 հազար դրամ արժե: Այնինչ դա դիտարկվել է որպես առևանգման փորձ և նրան տարել են ոստիկանական բաժանմունք: Ներկա պահին նա գտնվում է ոստիկանությունում:
Իսկ քաղաքապետ Ռուբեն Խլղաթյանի միջամտությամբ ընտրակաշառք բաժանողը բաց է թողնվել:
Անուշավան Ալեքսանյանի ձերբակալության և Արմավիրի քաղաքապետի կեղծված ընտրությունների դեմ բողոքող երիտասարդները մարտի 21-ին փակել էին Արմավիր-Երևան մայրուղին։ Նրանց մոտեցել և ցրվելու կոչ է արել արտգործնախարարության նախկին աշխատակից, արցախյան պատերազմի հերոս Դմիտրի Մարտիրոսյանը։
Երբ ցուցարարները սկսվել են ցրվել, մոտեցել է Ոստիկանության Արմավիր քաղաքի վարչության պետը, այնուհետև քաշքշուք է սկսվել Դմիտրի Մարտիրոսյանի հետ, և պետը, օգտվելով իր ծառայողական դիրքից, դաժան ծեծի է ենթարկել նրան։ Այժմ Դմիտրին գտնվում է կալանքի տակ։
Միջադեպի ընթացքում ձերբակալվել է մոտավորապես 5 անմեղ քաղաքացի, որոնք երեկ երեկոյան հարցաքննվելուց հետո ազատ են արձակվել: Սակայն Անուշավանին դեռ ազատ չեն ազատել:
«Ոստիկանները, ըստ իս, հստակ հրահանգ ունեին մի քանիսին ձերբակալելու, քանի որ մարդիկ արդեն գնում էին, իսկ ոստիկանները հակված էին կռիվ հրահրելու: Մարդը փախչում է, չի դիմադրում, բայց ոստիկանը մահակով հարվածում է: Սկսած ամենաբարձր պաշտոնյայից` մեկ մարդու մի քանի հոգով հարվածում էին: Իսկ մարդիկ ընդամենը դեմքն էին փակել, որ շատ չվնասվի»,- նկարագրեց Սարգիս Ցականյանը:
Հիշեցնենք, որ ներկա պահին հստակեցվում է , թե Արմավիրում բողոքի գործողություններ կանցկացվե՞ն, թե՞ ոչ:
Նշենք նաև, որ այս պահին ընթանում է վերահաշվարկ, որից հետո նոր պարզ կլինի, թե ինչ չափի ընտրախախտումներ են եղել: