Չարբախի Շիրակի 2ա/2 հանրակացարանում մոտ 100 ընտանիքներ 3 ամսից ավելի է սպասում են, որ «ջուր գա», բայց՝ չկա. «Առաջին լրատվական»-ին վստահեցրին տեղի բնակիչները։ «Միայն գիշերը 2-ի, 3-ի կողմերն է գալիս, այն էլ թույլ, ջուրը դույլերով կրում ենք դիմացի շենքերից, իսկ գիշերն անգամ լողանալ չենք կարողանում,- բարկացած ասացին մարդիկ,- հո լուսնոտ չենք, որ գիշերն են տալիս, խայտառակություն է»:
Տեղի բնակիչներից ազատամարտիկ Գագիկ Զաքարյանը մոտ մեկուկես ամիս առաջ բնակիչների 50 ստորագրություններով դիմել է «ԵրևանՋուր», որտեղից պատասխան է ստացվել, թե ամեն ինչ կարգավորված. «Ասված էր՝ ջրմուղի մագիստրալի գործերը արված են, բայց մինչև հիմա ջուր չունենք։ Գիշերը 3-ին են ամբողջ շենքում հերթապահում՝ ջրին սպասելով»: Հիմա բնակիչները դիմում են հասցեագրել քաղաքապետրանին, սպասում են պատասխանին: Բնակիչների պնդմամբ՝ շենքում ջուր չունենալու պատճառն այն է, որ «Ապավեն» ընկերությանը և հարկից մեկ այլ գործարանի շենքը սպասարկող խողովակից ջուր են հատկացրել։ «Չգիտեմ՝ ինչ են մտածել, ոնց են մտածել, բայց ճիշտ չեն մտածել»,- ասաց Գագիկ Զաքարյանը:
Շենքում բարկացած էին հատկապես կին բնակիչները։ «Լվացք չենք կարողանում անել, պետքարանի ջուրն էլ ենք կրում, եթե պաշտոնյաների կանայք այս վիճակում լինեին՝ մեկ օրում խնդիրը լուծում կստանար։ Գիտե՞ք՝ ինչ ենք ուզում. թող մի շաբաթ իրենց տիկնայք այս վիճակում հայտնվեն»,- ասացին նրանք՝ հավելելով, որ եթե հանգամանքների բերումով «հանրակացարանում են ապրում, չի նշանակում՝ էշ են»: