Վրացական apsny.ge լրատվական կայքը, վկայակոչելով իտալական լրատվամիջոցներին, նշում է, որ լիբիական առաջնորդ Մուամմար Քադաֆին խոստացել է յուրաքանչյուր սպանված ընդդիմադիրի համար վճարել 600 դինար (350 եվրո):
Այս մասին հայտարարել է գերի ընկած Քադաֆիի համակիրներից մեկը, ըստ որի` Տրիպոլի հասցված յուրաքանչյուր ապստամբի դիակը գնահատված է 350 եվրո:
Ներկայիս դրությամբ, Քադաֆիի զորքերը գնդակոծում են Բենղազիից 150 կիլոմետր դեպի հարավ ընկած Աջդաբիա քաղաքի մատույցներում գտնվող ապստամբների դիրքերը:
Նշվում է, որ նախքան ՄԱԿ-ի ԱԽ բանաձևի ընդունումը Քադաֆին հայտարարել էր զինապահեստների բացման և իր համակիրներին սպառազինելու մասին, որպեսզի իրենք պատրաստ լինեն տևական պատերազմին:
Հիշեցնենք, որ բրիտանական հեղինակավոր The Financial Times թերթի տվյալներով, Քադաֆիի վերահսկողության տակ գտնվող Լիբիայի Կենտրոնական բանկում է պահվում 143.8 տոննա ոսկի, ինչը գնահատվում է ավելի քան 6.5 միլիարդ դոլար: Ոսկու պաշարների այդ ցուցանիշով Լիբիան տեղ է զբաղեցնում աշխարհի առաջատար 25 երկրների շարքում:
Սակայն բանկում պահվող ոսկու չափը մոտավոր հաշվարկ է, իսկ իրականում այդ ոսկու քաշը կարող է մի քանի տոննայով ավելին լինել:
