ԼՂՀ Պաշտպանության բանակի հյուսիսային ուղղությամբ տեղակայված զորամասերից մեկի մարտական հենակետում հունիսի 11-ին սպանված ժամկետային զինծառայող, 20-ամյա Դերենիկ Մանուկյանի մորը տեղափոխել են հոգեբուժարան: Այդ մասին «Առաջին լրատվական»-ը տեղեկացավ նրա մերձավորներից:
Հիշեցնենք, որ իմանալով որդու հետ կատարվածի մասին՝ Դերենիկի մոր առողջական վիճակը կտրուկ վատացել էր: Նրան տեղափոխել էին հիվանդանոց, վերակենդանացման բաժանմունք: Նա անգամ չկարողացավ մասնակցել որդու հուղարկավորությանը: Եվ հիմա, նրան դուրս գրելով հիվանդանոցից, տեղափոխել են հոգեբուժարան:
Նշենք, որ Դերենիկի մահվան գործով ձերբակալված ծառայակից ընկերը՝ Վոլոդյա Բաբիկյանը, կալանավորված է: Նրան մեղադրանք է առաջադրվել Քրեական օրենսգրքի 373-րդ հոդվածի 3-րդ մասով՝ զենքի հետ վարվելու կանոնները խախտելու հետևանքով, անզգուշությամբ մարդու մահ պատճառելը: Այս դեպքում ի սկզբանե խոսք չկար դիտավորյալ սպանության մասին: Դեպքից հետո էլ ասում էին, որ Վոլոդյան ու Դերենիկը ընկերներ են եղել, ծառայության ժամանակ որևէ խնդիր չեն ունեցել, ինչը կարող էր հանգեցնել վիճաբանության, առավել ևս՝ կրակոցների:
Նշենք, սակայն, որ, ըստ տեղեկությունների, կալանավորված Վոլոդյան ևս որոշակի հոգեկան խնդիրներ ունի: ՊՆ քննչական ծառայության ավագ սպա Մերի Սարգսյանը, ի պատասխան «Առաջին լրատվական»-ի հարցի, ասաց, որ փորձաքննություն է նշանակված, և մինչև փորձաքննության պատասխանը չլինի, ոչինչ հստակ ասել հնարավոր չէ:
Հիշեցնենք նաև, որ Դերենիկը մահացու հրազենային վիրավորում էր ստացել գլխի շրջանում: Նա եղբոր հետ միասին ծառայում էր ԼՂՀ նույն զորամասում, և շատ քիչ էր մնացել, որ զորացրվի: